ராஜீவ் காந்தி கொலையான தினமும்... சில நினைவலைகளும்...

அது தேர்தல் ஜூரம் உச்சபட்சமாக தகித்துக் கொண்டிருந்த நேரம். மாயவரம் பார்க் மைதானத்தில் திமுக வின் தேர்தல் பிரச்சாரப் பொதுக்கூட்டம். கவர்னர் பர்னாலா தான் உரையாற்றிக் கொண்டிருக்கிறார்.....

கலைஞர் ஆட்சிக்கு எதிராக சட்டம் ஒழுங்கு சரியில்லை, அது இது புண்ணாக்கு என்றெல்லாம் மத்திய அரசு அறிக்கை கேட்க, அப்படியெல்லாம் தரமாட்டேன் என்று கவர்னர் பதவியில் அமர்ந்து கொண்டே கர்ஜித்த பஞ்சாப் சிங்கம் தான் அவர். அதையும் மீறி ஆரிய சூழ்ச்சியால் கலைக்கப்பட்ட திமுக ஆட்சியை மீண்டும் கலைஞர் தலைமையில் அரியணை ஏற்றிட பதவி தன் கால் தூசுக்கு சமம் என்று சொல்லிவிட்டு, தமிழகத்தின் பட்டி தொட்டியெங்கும், திமுக மேடைகளில் நடந்தது என்ன என்ற உண்மையை மக்களிடம் விளக்கிக் கொண்டிருந்த காலம் அது....!!

அதற்கு இரண்டு ஆண்டுகளுக்கு முன்பு தான் பதின்மூன்று வருட வனவாசத்தை முடித்துக் கொண்டு, திமுகவை மீண்டும் அரியணை ஏற்றியிருந்தார் தலைவர் கலைஞர். முதன் முதலில் திராவிடம் அரியணை ஏறியதை தாங்கமாட்டாமல், சர்க்காரியாவை ஏவி வீழ்த்திவிட்டோம் என்று மமதையில் இருந்த ஆரிய சக்திகள், மீண்டும் திராவிட ஆட்சியா? அதுவும் கலைஞர் தலைமையிலேயேவா? இவன் சகாப்தம் முடிந்து விட்டது என்றல்லவா எண்ணிக் கொண்டிருந்தோம், நம்மைக் கருவருக்க வந்து விட்டானே என்று பதைபதைத்துப் போயிருந்தார்கள்!

அவர்கள் பயந்த மாதிரியே, கனஜோராய் ஆரம்பித்த கலைஞர் ஆட்சி, அதுவரையிலும் மாநில அளவில் மட்டுமே சட்ட உரிமை வழங்கப்பட்டிருந்த (அதுவும் திராவிட ஆட்சியின் உபயம் தான்) பிற்படுத்தப்பட்டவர்களுக்கான அரசு கல்வி, வேலை வாய்ப்புகளில் இட ஒதுக்கீட்டை, மத்திய அரசு அளவிலும் நடைமுறைப் படுத்த பரிந்துரைக்கும் மண்டல் கமிஷன் அறிக்கையை மத்திய அரசு அமல்படுத்த வேண்டும், என்ற கோரிக்கையோடு அகில இந்திய அளவில் பிரபலமான தலைவர்கள் மற்றும் ஆங்காங்கே மக்கள் செல்வாக்குள்ள குட்டிக் கட்சிகளை எல்லாம் ஒருங்கிணைத்து தேசிய முன்னணி என்ற அமைப்பை உருவாக்கி, மத்தியிலும் ஆட்சி அதிகாரத்தில் பங்கேற்று ஆரியர்களுக்கு அங்கும் ஆப்பு வைக்கும் வேலையினை மிக மும்மரமாக செய்து கொண்டிருந்தார். அதில் வெற்றியும் கண்டு கொண்டிருந்தார்.

சர்க்காரியா கமிஷனை வைத்து பூச்சாண்டி காட்டியவர்களுக்கு, மண்டல் கமிஷன் மூலம் கடுக்காய் கொடுத்துக் கொண்டிருந்தார்!!!

விடுவார்களா? மூளையைக் கசக்க ஆரம்பித்து விட்டார்கள்.
முதலில் மாநில அரசின் ஆட்சி அதிகாரத்திலிருந்து இவர்களை அகற்ற வேண்டும். அதை வைத்துக் கொண்டு தானே அகில இந்திய அளவில் ஒத்த கருத்துள்ளவர்களை ஒருங்கிணைக்கிறார்கள்?! .....ஆனால் அடுத்த தேர்தலுக்கோ இன்னும் மூன்றாண்டுகள் இருக்கின்றதே?. அதுவரை விட்டு வைத்தால் அடிமடியிலேயே கைவைத்து விடுவாரே?! அதற்குள்ளாக எந்த வழியிலாவது ஆட்சியை விட்டு இறக்க வேண்டியது தான்!

இருக்கவே இருக்கின்றது இந்திய அரசியலமைப்புச் சட்டம் 356. அந்தப் பிரிவின் படி ஒரு மாநில அரசை பதவி நீக்கம் செய்ய வேண்டுமானால் இரண்டு காரணங்களில் ஒன்று இருந்தாலே போதும். கவர்னரிடம் அறிக்கை வாங்கி கலைத்து விடலாம். ஒன்று: அந்த மாநில அரசால் கட்டுப்படுத்த இயலாத அளவிற்கு சட்டம் ஒழுங்கு சீர் கெட்டிருக்க வேண்டும். அல்லது இரண்டாவது காரணமான: இனி ஆட்சியை நடத்த முடியாத அளவிற்கு நிதி நிர்வாகம் சீர் கெட்டுப் போயிருக்க வேண்டும்.

ஆனால் தமிழகமோ அமைதிப் பூங்காவாகத்தான் இருக்கின்றது. நிதி நிர்வாகமும் நல்லபடியாகத்தான் இருக்கின்றது. என்ன செய்யலாம்?
ஒஹ்... இருக்கவே இருக்கின்றது இலங்கைப் பிரச்சினை!
ஆரிய அடிவருடிகளான சிங்கள அரசுக்கு கை கொடுத்த மாதிரியும் இருக்கும். திமுகவையும் ஆட்சிக் கட்டிலிலிருந்து இறக்கி விட்ட மாதிரியும் ஆகும். ஆக ஒரே கல்லில் இரண்டு மாங்காய்!!  .... ம்.. ஆரிய ஊடகங்களின் தாரை தப்பட்டைகள் முழங்கட்டும்.....!!!

விடுதலைப் புலிகளின் ஊடுறுவல் தமிழகத்தில் முன் எப்பொழுதும் இல்லாத அளவிற்கு இருக்கிறது. திமுக அரசின் உதவியால் அவர்கள் சர்வ சுதந்திரத்துடன் இங்கு முகாம்கள் அமைத்து பயிற்சியில் ஈடுபடுகின்றனர். அதனால் தமிழகத்தில் சட்டம் ஒழுங்கு பெருமளவில் பாதிக்கப்பட்டு மக்கள் ஒரு வித அச்ச உணர்வில் தத்தளிக்கின்றார்கள் என்று  இன்றைய ஈழத்தாயும் என்றுமே ஆரியமாதாவுமாகிய அம்மையார் முன்னுரை வாசிக்க, அதை அப்படியே சுனா சாமிகளும், சோ, வெங்கட்ராமன் வகையறாக்களும் வழிமொழிய....   ஆரிய ஊடகங்கள் இந்த கருத்தியலுக்கு விதவிதமான பொழிப்புரைகள் எழுத ஆரம்பித்து விட்டன.

அதே சமயம், இலங்கை சென்ற இந்திய அமைதிப்படை அங்குள்ள தமிழர்களையே சூறையாடுவதாக பலமான குற்றச்சாட்டு அங்கிருந்து எழ, அது உடனடியாக திரும்பப்பெறப்பட வேண்டும் என்ற போராட்டம் தமிழகத்தில் வெடிக்கிறது. ஆளும் கட்சியான திமுகவின் அமோக ஆதரவால் போராட்டம் விண்ணைத் தொட, மத்திய அரசு வேறு வழியின்றி கட்டுப்படுகிறது.

சென்னையில் வந்திறங்கிய இந்திய அமைதிப்படையை, இந்திய அரசியலமைப்பு நடைமுறைப்படி மாநில முதல்வர் சென்று வரவேற்க வேண்டும்.  அரசியலமைப்புச் சட்டப்படி என் இனத்தை கொன்று மானபங்கப்படுத்திய உன்னை சிவப்புக் கம்பளம் விரித்து வரவேற்று, என் ஆட்சிக் கட்டிலை இறுக்கப் பிடிப்பேன் என்று நினைத்தாயோ....... என்று கலைஞர் அதை மறுதலித்து விட்டார்.

இது போதாதா அவர்களுக்கு? இந்திய இறையாண்மையையே கேலிக்கூத்தாக்கி விட்டார், விடுதலைப் புலிகள் வேறு தமிழகத்தில் நர்த்தணம் ஆடிக் கொண்டிருக்கின்றார்கள், தமிழக மக்களோ பீதியில் வீட்டிற்குள்ளேயே அடைந்து கிடக்கின்றார்கள். ஆகையால் உடனடியாக இந்த ஆட்சி அகற்றப்பட வேண்டும் என்று மத்திய உள்துறை அமைச்சர் சுபோத்கான் சகாய் நேரடியாக வந்து சென்று அறிக்கை சமர்ப்பிக்க... ஆட்சி கலைக்கப்படுகிறது!

அதன் தொடர்ச்சியாகத்தான் கவர்னர் ஆட்சி. மீண்டும் சட்டமன்றத்துக்கு தேர்தல் வரவேண்டும். இந்த ஒரு காரியத்துக்காகவே காத்திருந்தது போல மத்திய அரசில் 63 எம்பிக்கள் மட்டுமே கொண்ட சந்திரசேகர் அரசுக்கு வெளியில் இருந்து ஆதரவு தந்து கொண்டிருந்த ஜெயலலிதாவின் கூட்டாளியான ராஜீவ் காந்தியின் காங்கிரஸ் கட்சி, தனது ஆதரவை விலக்கிக் கொள்ள, பாராளுமன்றத்திற்கும் தேர்தல் அறிவிக்கப்பட்டுவிட்டது.

ஆக, பாராளுமன்றம் மற்றும் தமிழக சட்ட மன்றத்திற்கான தேர்தல் இரண்டுக்குமான தேதி குறிக்கப்பட்டு, பிரச்சாரம் உச்சக் கட்டத்தை அடைந்திருந்த நேரம் தான் நாம் ஆரம்பத்தில் பார்த்த ஒரு மாலை நேர தேர்தல் பிரச்சாரம். எந்தவொரு சிறு தவறும் சுட்டிக் காட்ட இயலாத அளவிற்கான இரண்டாண்டு கால ஆட்சியை திமுக கொடுத்திருந்தது. இலங்கைப் பிரச்சினையிலும் மக்கள் ஒட்டுமொத்தமாக திமுகவையே ஆதரித்துக் கொண்டிருந்தார்கள். தவறான காரணத்தைக் காட்டி இரண்டே ஆண்டுகளில் ஆட்சி கலைக்கப்பட்ட அனுதாப அலை வேறு.

இக்காரணிகளால் திமுக தான் மீண்டும் ஆட்சியைப் பிடிக்கும் என்று அனைத்து பத்திரிகைகளின் சர்வேக்களும் தெள்ளத் தெளிவாகக் கூறின. தராசு பத்திரிகையின் சர்வே 175 இடங்கள் வரை திமுக வெல்லும் என்று அடித்துக் கூறியிருந்தது.

ஓவர் டு தேர்தல் பிரச்சாரக் கூட்டம்....

மயிலாடுதுறை பாராளுமன்ற தொகுதிக்கான வேட்பாளராக ராஜீவ் காந்தியின் ஆப்த நண்பரும் இந்திய வெளியுறவுத்துறை ஆட்சிப்பணியில் இருந்த மணி சங்கர் ஐயர் அறிவிக்கப்பட்டிருந்தார். வெற்றி வாய்ப்பு நிலை சரியில்லாததால், அவருக்காகவே மயிலாடுதுறை பிரச்சாரக் கூட்டத்தில் பேசுவதற்காக அன்றைய தினம் ராஜீவ் காந்தி தமிழக பிரச்சாரத்திற்கு வருவதாக மாயவரம் முழுவதும் செய்தி பரவியிருந்தது. அந்தக் கூட்டம் இரவு பத்து மணிக்கு மேல் மாயவரம் பெரிய ராஜன் தோட்டத்தில் நடைபெறுவதாக இருந்தது.

மிகப் பெரிய அளவிலான ஏற்பாடுகள் செய்யப்பட்டிருந்தன. கிராமங்களிலிருந்து வேன்கள் மூலம் ஆட்கள் கொண்டுவந்து குவிக்கப்பட்டுக்கொண்டிருந்தனர். அப்படி காசுவாங்கி வந்த கூட்டத்தில் ஒரு பெரும் பகுதி மாலை 7 மணிக்கே ஏற்பாடு செய்யப்பட்டிருந்த கவர்னர் பர்னாலா கூட்டத்திற்கு ஆவலோடு திரண்டு வந்திருந்தனர். பார்க் மைதானம் முழுமையும் நிரம்பி, பார்க்கிலும் மக்கள் வெள்ளம் குடிபுகுந்தது. இந்தப் பக்கம் பியர்லஸ் தியேட்டர் ரோடு, அந்தப் பக்கம் பஸ்ஸ்டாண்டு வரையிலும் கூட்டம் நிரம்பி வழியவே, போக்குவரத்தே ஸ்தம்பித்துப் போனது.

பர்னாலா கிட்டத்தட்ட ஒரு மணி பத்து நிமிடம் உரை நிகழ்த்தினார். தன் பேச்சைக் கேட்பதற்காக இவ்வளவு பெரிய மக்கள் வெள்ளத்தை தன் வாழ்நாளில் கண்டதேயில்லை என்று குறிப்பிட்டார். அந்த உற்சாகத்திலேயே  "நான் கிளம்பியவுடன், இங்கு வரவிருக்கும் ராஜீவ் காந்தியைப் பற்றி தெரிந்து கொள்ளுங்கள்" என்று அவரைப் பற்றியும் கிழித்துத் தைத்தார்.

கூட்டம் இனிதே நிறைவுற்றது. இந்தத் தேர்தலில் திமுக 200 சீட்டுகளுக்கும் அதிகமாக பெறும் என்று உற்சாகமாக பேசிக் கொண்டே கிளம்பினோம். வீட்டிற்கு செல்லும் வழியில் ராஜன் தோட்டம் வழியாகச் சென்றோம். மைதானத்தில் கால்வாசி கூட நிரம்பியிருக்கவில்லை. போலீஸ் தலைகள் தான் நிரம்பியிருந்தன. ஸ்ரீ பெரும்புதூரிலும் கூட்டம் பேசிவிட்டு வருவதால் இங்கு வர 12 மணி ஆகிவிடும் என்றார்கள். அப்பொழுதே மணி ஒன்பது ஆகிவிட்டிருந்தபடியால், இதற்கு மேல் இங்கு கூட்டம் சேராது என்று கேலி பேசிக் கொண்டே, திமுகவின் வெற்றி அப்பொழுதே எங்கள் கைகளில் வந்துவிட்டது போன்ற களிப்பில் வீடு வந்து சேர்ந்தோம்.

ஒரு மாதமாக கடும் உழைப்பு. மக்களிடம் திமுகவுக்கு ஆதரவாக பெரும் எழுச்சி ஏற்பட்டிருப்பதை இன்றைய கவர்னர் பொதுக்கூட்டத்தில் கண்கூடாக காண முடிந்தது. அதே சமயம் அதிமுக காங்கிரஸ் கூட்டணிக்காக, காசு கொடுத்துக் கூட அவர்களால் கூட்டம் கூட்ட முடியவில்லை. இன்னும் இரண்டு தினங்களில் தேர்தல். நிச்சயம் வெற்றி நமக்குத்தான் என்று மனக்கணக்கு போட்டுக்கொண்டே நிம்மதியாக கண்ணயர்ந்தேன். (என்னைப் போலத்தான் ஒவ்வொரு திமுக காரனுக்கும் அந்த இரவு கழிந்திருக்கும்)

அப்பொழுதெல்லாம் எங்கள் ஊரிலேயே மொத்தமாக 30 பேர் வீட்டில் டீவி இருந்தாலே பெரிய விஷயம். அதுவும் தெளிவாகத் தெரியாது. எங்களுக்கெல்லாம் ரேடியோ தான் ஒரே பொழுது போக்கு சாதனம். காலை 6.50 நியூஸ் ரொம்ப பிரபலம். கொஞ்சம் சமூக அரசியல் சிந்தனை உள்ளவர்கள் அதைக் கேட்கத் தவறமாட்டார்கள். அதுவும் தேர்தல் நேரம். காலை எழுந்து பல் துலக்கி, காப்பியோடு ரேடியோவை ஆன் செய்தால்......  தலைவர்கள் இறந்தால் ஓடும் சோக கீதம் ஓடிக்கொண்டிருந்தது. கொஞ்சம் அதிர்ச்சியாகத்தான் இருந்தது.

யாராய் இருக்கும்? இன்னும் பத்து நிமிடத்தில் செய்திகளில் சொல்லிவிடுவார்கள். அதற்குள் அவசரம். வெளியில் வந்து கேட்டால் தெருவிலும் யாருக்கும் தெரியவில்லை. சட்டையை மாட்டிக் கொண்டு தெருமுக்கு, மெயின் ரோடு வந்தால் கூட்டம் கூட்டமாக நின்று பேசிக் கொண்டிருந்தார்கள். நெருங்கிச் சென்று விசாரித்தால், நேற்று இரவு ராஜீவ் காந்தி மீட்டிங்குக்கு வரலியாம். அவருக்கு தான் ஏதோ பிரச்சினைன்னு ஃபோன் வந்து காங்கிரஸ்காரங்கல்லாம் போயிருக்காங்களாம்....

ரேடியோ சோக கீதம் அவருக்காக இருக்குமோ? அவசரமாக வீட்டுக்கு ஓடினேன். சரோஜ் நாராயணசாமி அழும் குரலில் பேசிக் கொண்டிருந்தார். ராஜீவ் உடல் சிதறி இறந்ததாக. காங்கிரஸின் அப்போதைய மாநில தலைவர் வாழப்பாடி ராமமூர்த்தி பேசினார். விடுதலைப் புலிகளை வைத்து கருணாநிதி தான் ராஜீவ் காந்தியைக் கொன்றதாக பட்டவர்த்தனமாக அறிவித்தார்.....

ரெடி ஸ்டார்ட் மீஜிக்........!!!   அப்பொழுது திமுகவினருக்கு எதிராக ஆரம்பித்த கலவரம் அடங்க பத்து நாட்கள் ஆகின!!!!!

உடனடியாக நடைபெற்ற தேர்தலில் கலைஞர் மட்டுமே திமுக சார்பாக துறைமுகம் தொகுதியிலிருந்து வெற்றிவாகை சூடினார்.....   முதன் முறையாக ஜெயலலிதா தமிழக முதல்வரானார்!!

ஆட்சியைப் பிடித்த ஜெயலலிதா, முதலில் செய்தது..... இந்தியாவில் விடுதலைப்புலிகள் இயக்கத்திற்கு முழுமையான தடை வாங்கிக் கொடுத்ததும், அவர்களுக்கு ஆதரவான எந்த இயக்கத்தையும், பேச்சுக்களையும் இரும்புக் கரம் கொண்டு அடக்கியதும் தான். அப்படிப்பட்ட ஜெயலலிதா தான் விடுதலைப் புலிகளின் ஆதரவாளர்களால் ஈழத்தாய் என்றும், இலை மலர்ந்தால் ஈழம் மலரும் என்றும் வானளாவ புகழப்பட்டார்!!!!!!