நமக்கு நாமே நாடகம்

நமக்கு நாமே நாடகத்தின் நேற்றைய சீன்...

ஸ்டாலின் சீன் ஸ்பாட்டுல வந்து நிக்குறாரு. நாளஞ்சு குடிசை வீடு பிய்ந்து போன நிலையில் அங்கே செட் போடப்பட்டிருக்கு, ஐந்தாறு பேர் கிராமத்து கெட்டப்பில் அழுக்கு வேட்டி, சட்டையுடன் நிற்கிறார்கள், கேமெரா லைட்டிங் எல்லாம் ரெடியா? என்று இயக்குனர் சபரீஷ் கேட்கிறார், ரெடி சார்ன்னு குரல் வந்தவுடன், இயக்குனர் கை அசைக்க, வரிசையாக நான்கு டேங்கர்களில் மினரல் வாட்டர் அங்கு கொட்டப்படுகிறது....

இப்பொழுது அந்த இடம் வெள்ளம் சூழ்ந்த குடிசைப்பகுதி போல் காட்சியளிக்கிறது. இயக்குனர் ரெடி ஆக்‌ஷன் என்றவுடன்...

அந்த ஐந்தாறு பேரும் ஸ்டாலினிடம் ஏதேதோ பேசுவது போல் பாவனை செய்கிறார்கள்..., அவரும் அதைக் கேட்பது போல பாவனை செய்கிறார். இந்தக் காட்சியை பல்வேறு கோணங்களில் ஸ்டில் மற்றும் மூவி கேமராக்கள் பதிவு செய்கின்றன. எல்லாம் திருப்தியாக முடிந்தவுடன் இயக்குனர் கட் சொல்கிறார்.

இந்தக் காட்சியின் ஒரு படத்தைத்தான் நீங்கள் இங்கே பார்க்கின்றீகள். நமக்கு நாமே படத்தில் புதிதாக இணைக்கப்பட்டிருக்கும் காட்சி தான் மேலே நடந்த உண்மைச் சம்பவம்....!!!

கடலூர்ல என்னவோ மழை பேஞ்சுதாமா... அங்க வெள்ளக்காடா ஆயிட்டுதாமா.... மக்கள் வீடுகள் எல்லாம் இடிஞ்சி போயி ரோட்டுல நிக்கிறாங்களாமா... சாப்பாடுக்கே வழி இல்லாம அல்லாடுறாங்களாமா... அமைச்சருங்க, அதிகாரிங்க எல்லாம் அவங்கள வந்து பார்க்கலயாமா.... இவரு மட்டும் போயி பார்த்தாராமா...

யாருட்ட காது குத்துறீங்க...! தமிழ் நாட்டுல பாலாறும், தேனாறும் ஓடுறது எங்களுக்குத் தெரியாதா? தெரியலன்னா போயி ஜெயா டீவி பாருங்கய்யா. தமிழ்நாட்டுல சின்னதா ஒரு தூவானம் போட்டாக் கூட, அமைச்சருங்க ஓடிப்போயி, அங்க இருக்குற மக்களுக்கு அரிசி கொடுக்குறது என்ன? பருப்பு குடுகுறது என்ன? வேட்டி சேலை கொடுக்குறது என்ன? இதெல்லாம் போய் ஜெயா டீவில பாருங்கய்யா.., அதுல தெளிவா காட்டுறாங்க.

அத விட்டுட்டு இப்புடி டிராமா போட்டுக்கிட்டு இருக்கீங்களே... இதெல்லாம் நியாயமா? இதுல ஆயிரம் பேருக்கு காசு கொடுத்து சாலை மறியல் டிராமா வேற போடுறீங்க. அதான் போலீஸ வச்சி அடி அடின்னு அடிச்சி வச்சாங்கள்ல ஆப்பு?!

இனிமே இப்புடி டிராமா கீமா போட்டீங்க... இப்புடித்தான் போலீஸ் லத்தி சார்ஜ் வரும்... ஆமா...!

இப்படிக்கு....

300 வருடங்களாக திமுகவுக்கே வாக்களித்து வந்த பரம்பரையைச் சேர்ந்த இப்பொழுதைய நட்டநடுநிலையாளர்..!!

திமுக.... கொஞ்சம் மாத்தி யோசிக்கனும்..!

திடீர்ன்னு கலைஞர் ஊழல் பண்ணிட்டாருன்னு முப்பது, நாற்பது புகார் அடங்கிய பட்டியலை கொடுப்பாங்க. அதை ரேடியோல, பேப்பர்ல ஃப்ளாஷ் பண்ணுவாங்க. அதுக்கெல்லாம், அடிப்படை, ஆதாரம், லொட்டு, லொசுக்குனு எந்த கந்தாயமும் இருக்காது. அதை விசாரிக்கிறதுக்கு சர்க்காரியான்னு ஒரு கமிஷனை அமைத்து தினம் தினம் அந்த செய்திகள் பேப்பர்ல வர்ற மாதிரி பார்த்துப்பாங்க.

மக்களும் அதை வாய பொளந்து பார்த்துக்கிட்டே இடையில் வருகின்ற பொதுத் தேர்தல்ல கலைஞரை தோற்கடிச்சிடுவாங்க. கலைஞரும் ஒவ்வொரு புகாருக்கும் விளக்கத்துக்கு மேல விளக்கம் கொடுத்து அசராம அடிச்சு ஆடுவாரு. அதுக்கப்பறமா அந்த புகர்ல ஒன்னுத்துக்கு கூட ஆதாரமோ, முகாந்திரமோ இல்லன்னு தூக்கி கடாசிட்டு போயிட்டே இருப்பாங்க. ஆனா இடைப்பட்ட காலத்துல கலைஞர் ஆட்சியை இழந்திருப்பார்.

திரும்பி போராடி கீராடி அவர் ஆட்சியை பிடிச்சார்ன்னா...., விடுதலைப் புலிகளை வச்சி ராஜீவ் காந்திய கலைஞர் கொன்னுட்டாருன்னு ஜஸ்ட் லைக் தட் புகார் வாசிப்பாங்க... வழக்கம் போல மக்கள் வாய பொளக்குறதும், கலைஞர் ஆட்சியை இழக்குறதும்... கடேசில, கலைஞருக்கும் அதுக்கும் சம்பந்தமில்லைன்னு தீர்ப்பு வர்றதும் நடக்கும்...!!

மீண்டும் கலைஞர் ஆட்சிக்கு வருவார்... இப்ப யாருமே நம்ப முடியாத அளவுக்கு ஒரு தொகையை, ஒன்னே முக்கால் லட்சம் கோடி கலைஞரோட மந்திரி ஊழல் பண்ணிட்டதா சொல்லி நியூஸை பரப்புவாங்க... மீண்டும் மக்கள் வாயை பிளப்பாங்க.... ஆட்சி பறிபோகும்... கேஸு கிட்டத்தட்ட ஊத்திக்கிற நிலைக்கும் வந்து விட்டது....

அதாவது அவிங்க பாட்டுக்கும்... அவதூறை அள்ளி வீசி மீடியால ஃப்ளாஷ் பண்ணிடுவாங்க. கலஞரும் திமுக தரப்பும் அதை பொய்யின்னு சொல்லி ப்ரூஃப் பண்ணிட்டு வெளில வர்றத்துக்குள்ள் ஆட்சி போயி அவிங்க வந்து உட்கார்ந்திடுவாங்க....!

இதே டிரெண்டைத்தான், தளபதியிடமும் அவாள்லாம் அப்ளை பண்ணியிருக்கா...!! இவர் கரை படியாத கரங்களுக்குச் சொந்தக்காரர்ன்னு தெரியும். அதனால ஊழல் புகர் சொல்றது எல்லாம் வேலைக்கு ஆகாதுன்னு முடிவு பண்ணி, இவர் மக்களோட மக்களா பழகுறதுனால தான இவரோட இமேஜ் கூடுதுன்னு....

அதுக்கு ஆப்பு வக்கிற மாதிரி மெட்ரோ பளார்ன்னு ஒரு டிரெண்டிங்கை உருவாக்கினாங்க. அதுக்கு தளபதியே விளக்கம் கொடுத்து, சம்பந்தப்பட்ட நபரே மறுத்தவுடன், விவகாரம் முடிவுக்கு வந்தாலும், தளபதி தொண்டரை கன்னத்தில் அடித்தாரா? என்ற விவாதத்தை மக்களிடம் முன்னெடுக்க வைத்ததில் அவர்கள் வெற்றி பெற்று விட்டார்கள்.

இதற்கு மேலும் இப்படிப்பட்ட விஷயங்களை திமுக வழக்கம் போல கடந்து செல்வது நல்லதல்ல. இது போன்ற விஷயங்களை முன்னெடுப்பவர்கள் மீது அவதூறு வழக்கை முன்னெடுத்து, இன்னும் பலமாக தங்கள் தரப்பு நியாயத்தை எடுத்து வைக்க வேண்டும். இதற்கு மேலும் டிஃபன்ஸ் ஆடிக் கொண்டிருப்பது திமுகவுக்கு பலனளிக்காது. எதிரிகளை டிஃபன்ஸ் ஆட வைக்க வேண்டும்.

இது போன்ற டீவி விவாதங்களில் திமுக சார்பாக யாரும் கலந்து கொள்ளக் கூடாது. அதை கடுமையான அறிக்கைகள் மூலம் தெளிவுபடுத்தி விட்டு... இந்த மாதிரியான அவதூறு விவாதங்களுக்கு சட்ட ரீதியாக தடை வாங்கவும் வேண்டும். பலமாக எதிர்க்கும் போது தான் மக்களும் திமுகவை நம்புவார்கள்.

திமுக.... கொஞ்சம் மாத்தி யோசிக்கனும்..!

மோடியும் லேடியும் ஒன்னு.. அறியாதார் வாயிலே மண்ணு...

வருமானவரித்துறை வழக்கு, சொத்துக்குவிப்பு உயர்நீதிமன்ற தீர்ப்பு... இவற்றுக்கு முன்னால் மத்திய அமைச்சரவையில் இரண்டாம் இடத்தில் உள்ள அருண்ஜெட்லி வந்து பார்த்ததையும்...

சொத்துக்குவிப்பு வழக்கு உச்சநீதிமன்றத்தில் இருக்கின்ற பொழுது, பிரதமரே நேரில் வந்து பார்ப்பது பற்றியும்....

இந்த ஜுஜுபி மேட்டர்க்கு எல்லாம் தாம் இந்த சந்திப்புகள் நடந்ததாக யாராவது நினைத்தால்... அவர்களுக்கு எல்லாம் ஒரே ஒரு விஷயத்தை மட்டும் என்னால் உறுதிகூற முடியும்...

லேடியும், மோடியும் ஒன்னு... இதை அறியாதவர்கள் வாயில் பன்னு..!! என்பது தான் அது!!

வேற என்ன தான் மேட்டர் என்கின்றீர்களா?!

பாஜக எத்தனை மோடி மஸ்தான் வேலையைப் போட்டாலும், தமிழகத்தில் 4 சதவிகித வாக்குகளுக்கு மேல் அது எந்தக் காலத்திலும் வாங்க முடியாது என்பது அவர்களுக்கே தெளிவாகப் புரிந்து தான் போயிருக்கிறது.

இங்கே கொஞ்சமாவது, ஃபிலிம் காட்ட வேண்டுமென்றால் கூட..., அதிமுக அல்லது திமுகவோடு கூட்டணி அமைப்பது மட்டுமே ஒரே வழி..! இதில் பாஜகவின் லகான் அதி தீவிர இந்துத்துவா முகம் கொண்ட மோடி, அமித்ஷா, அருண்ஜெட்லி வசம் இருக்கும் வரை பாஜகவால் திமுகவை நெருங்கவே முடியாது என்பது தான் யதார்த்தம்.

அடுத்து இருக்கும் ஒரே ஆப்ஷன், அதிமுக தான். பாராளுமன்ற தேர்தலுக்கு முன்னால், பாஜக ஆட்சியைப் பிடிப்போமா இல்லையா என்று எந்த உத்திரவாதமும் இல்லாத நிலையில்..., ஜெயலலிதாவும் பிரதமர் கனவோடு தேசிய அளவில் மூன்றாம் அணி.. அது இது என்று ஜம்பம் காட்டிய நிலையில், அதிமுகவோடு கூட்டணி பற்றி பேசும் தைரியும் பாஜகவுக்கு நிச்சயமாக இருந்திருக்கவில்லை.

ஆனாலும் திமுகவும், திகவும் எப்படி இரட்டைக் குழல் துப்பாக்கியோ... அதே மாதிரி தான் அதிமுகவும், ஆர் எஸ் எஸ்ஸின் பிள்ளையான பாஜகவும் என்பது ஊரறிந்த விஷயம் தான். அதனால் தான் அவர்களுக்கிடையேயான மனோ ரீதியிலான ஒத்த கருத்தில், ஒருவேளை பாஜகவுக்கு ஆட்சியமைக்கும் அளவிற்கு பலம் கிடைக்காவிட்டால், ஜெயலலிதா ஆதரவில் ஆட்சி அமைக்கும் திட்டமும், ஒருவேளை எதிர்க்கட்சிகளின் பலம் அதிகமாக இருந்து பாஜக பெரிய அள்வில் சோபிக்கவில்லை என்றால், மூன்றாவது அணி என்ற ஃபார்முலாவில் மற்ற கட்சிகளின் கூட்டணியோடு, ஜெயலலிதாவை பிரதமராக்கிவிட்டு, அது கவிழாமல் இருக்க பாஜக வெளியிலிருந்து முட்டுக்கட்டை கொடுக்கும் அடுத்த ஆப்ஷனையும் ஆர் எஸ் எஸ் வகுத்திருக்கும்..!

ஆர் எஸ் எஸ்ஸைப் பொறுத்தவரை, ஒத்த கருத்துடைய தம் பிள்ளைகளில் ஒன்றான மோடி வந்தால் என்ன? ஜெயலலிதா வந்தால் என்ன? இரண்டும் ஒன்று தானே?! இருவருடைய ஆட்சியும் ஆர் எஸ் எஸ்ஸின் கொள்கைப்படித்தானே இருக்கும்?!

ஆகவே தான் தமிழகத்தைப் பொறுத்தவரை ஜெயலலிதாவின் வெற்றியை மிக இலகுவானதாக அமைத்துக் கொடுக்கும் பொறுப்பும் ஆர் எஸ் எஸுக்கு வந்து விட்டது. ஏற்கனவே இரண்டரை வருடங்களுக்கு மேலாக ஆட்சியில் இருக்கும் அதிமுகவுக்கு நிச்சயம் எதிர்ப்பு ஓட்டுக்கள் என்பது இருக்கும். அந்த எதிர்ப்பு ஓட்டுக்கள், ஒருமுகப்படுத்தப்பட்டு சிதறாமல் திமுகவுக்கு வந்தால், நிச்சயம் அதிமுக மண்ணைக் கவ்வும்...!

இந்த நிலையில் தான் அதிமுகவை வெற்றிபெற வைக்கும் ஃபார்முலாவை கையிலெடுத்தது பாஜக. அது வகுத்த திட்டப்படி அதிதீவிரமாக செயல்பட்டு, தான் குறைந்த இடங்களை வைத்துக் கொண்டு, திமுக தவிர தமிழகத்தின் அனைத்து சில்லறை எதிர்க்கட்சிகளையும், தமிழருவி மணியன், சோ, தா. பாண்டியன் போன்ற பல்வேறு புரோக்கர்களைக் கொண்டு, அக் கட்சிகள் கொடுத்த அவமானங்களை எல்லாம் பொறுத்துக்கொண்டு, மெகா கூட்டணி என்ற ஒரு பிம்பத்தை மக்கள் முன்னே வைத்தது.

குழம்பிப் போன உண்மையான நடுநிலையாளர்கள் இந்தக் கூட்டணிக்கு வாக்களிக்க, ஜெயலலிதா பிரதமரானால் தமிழகத்திற்கு நல்லது தானே என்ற நப்பாசையில் பல அப்பாவி நடுநிலைவாதிகள் அதிமுகவுக்கு வாக்களிக்க.... அதிமுக அமோக வெற்றி பெற்றது..!!

மற்ற மாநிலங்களில் பாஜக மோடி அலையில் வெற்றியைக் குவிக்க, அறுதிப் பெரும்பான்மையோடு பாஜகவே ஆட்சி அமைத்து விட்டது.

இப்பொழுது தான் பாஜகவின் தமிழக கால்கோள் நிகழ்வுக்கான இரண்டாம் கட்ட திட்டம் அரங்கேற ஆரம்பமாகியிருக்கின்றது. மத்திய ஆட்சி அதிகாரத்தில் தற்பொழுது பாஜக இருப்பதால், அதன் மூலம் ஜெயலலிதாவுக்கு கிடைக்கக் கூடிய பல்வேறு உதவிகளும்... அந்த உதவிகள் கிடைக்காவிட்டால் ஜெயலலிதாவின் எதிர்காலம் என்ன என்பதும்... தமிழகம் முழுவதும் தற்பொழுது அதிமுகவுக்கு எதிரான போராட்டங்கள் வெடித்துக் கிளம்பியிருப்பதும்....

...ஆக இவை அனைத்தும் ஜெயலலிதா முன்னால் காட்சியாக விரிக்கப்பட, அதிமுக கூட்டணியில் பாஜக ஒரு கணிசமான எண்ணிக்கையில் தொகுதிகளைப் பெற்று வரும் சட்டமன்ற தேர்தலை சந்திக்கும் சூழலும் உருவாகியிருப்பதைத் தான் நேற்றைய ஜெயலலிதா இல்லத்திற்கான மோடி விஜயம் எனக்கு உணர்த்திக் காட்டுகிறது.

ஆகவே வரும் 2016 சட்டமன்ற தேர்தலுக்கான தமிழகத்தின் ஒரு பக்க கூட்டணி கிட்டத்தட்ட தயார்...!!

இன்னொரு பக்கமான, திமுகவின் கூட்டணி வியூகம் பற்றி அடுத்த கட்டுரையில் கொஞ்சம் அலசுவோம்...!!