திமுகவை எப்படித்தான் வீழ்த்துவது?

திமுகவை எப்படித்தான் வீழ்த்துவது?

அதன் புதிய தலைவரை எப்படித்தான் முன்னேற விடாமல் தடுப்பது?!

இது தான் இன்றைய மத்திய, மாநில பாசிச ஆட்சியாளர்கள் முன் இருக்கும் ஒரே கேள்வி மற்றும் கவலை மற்றும் ஆராய்ச்சி..!கடந்த நாலரை ஆண்டுகளாக மத்தியில் பாஜகவும்... ஏழு ஆண்டுகளாக தமிழகத்தில் அதிமுகவும் ஆண்டு கொண்டிருக்கின்ற நிலையில்....

ஏழு ஆண்டுகளுக்கு முன்பாக என்னென்ன காரணங்களைச் சொல்லி திமுக ஆட்சியை தமிழகத்திலிருந்து ஊடகங்களின் துணைக் கொண்டு அப்புறப்படுத்தினார்களோ.... என்னென்ன காரணங்களைச் சொல்லி மத்தியில் காங்கிரஸ் தலைமையிலான ஐக்கிய முற்போக்கு ஆட்சியை அப்புறப்படுத்தினார்களோ....
அந்த காரணங்கள் அனைத்துமே ஒரு மாய வலை தான், ஊதிப் பெரிதாக்கப்பட்ட வெறும் காற்றடைத்து பலூன் தான்.... இன்னும் கொஞ்சம் வெளிப்படையாகச் சொல்ல வேண்டுமானால் அவைகள் அனைத்துமே பச்சைப் பொய்கள் தான் என்பதை இப்பொழுது தான் மக்கள் உணர ஆரம்பித்திருக்கின்றார்கள்..!
2011க்கு முன்னதாக திமுகவை ஆட்சியில் இருந்து அகற்றுவதற்கு இவர்கள் மிகப் பெரிய அளவில் பரப்புரை செய்த ஒன்றிரண்டு குற்றச்சாட்டுகளைப் பற்றி மட்டும் நாம் இங்கே பார்த்தால்...
ஒன்று..., இலங்கைப் பிரச்சினையில் திமுக ஈழத் தமிழர்களுக்கு துரோகம் இழைத்து விட்டது என்பதும்... இரண்டாவதாக 2ஜி என்ற விஷயத்தில் உலக அளவிலான மாபெரும் ஊழலை திமுகவினர் செய்து விட்டார்கள் என்று பரப்புரை செய்ததுமே ஆகும்.
ஒன்று உணர்வுகளை சீண்டிப் பார்க்கும் பிரச்சினை, இன்னொன்று ஊழல் பிரச்சினை.
இது போன்று ஒட்டுமொத்த தமிழகமும் திமுகவுக்கு எதிராக திரளுகின்ற அளவிற்கு இல்லாத ஒன்றை இருபதாகச் சொல்லி மக்களை நம்ப வைத்து ஏமாற்றி, மக்களின் கோபங்களை திமுக மீது திணித்து....
அந்த மனநிலையில் மக்கள் இருக்கின்ற போது, அடுக்கடுக்காக, எந்த அடிப்படை ஆதாரமுமே இல்லாமல் குற்றச்சாட்டுகளை வீசும் போது, அவை அனைத்தையுமே மக்கள் ஏற்றுக்கொள்வார்கள் என்ற பொது விதியின் படி திமுகழகத்திற்கு எதிராக ஒட்டுமொத்த தமிழகத்தையும் திரட்டி....
இந்த சரியான தருணத்தில்....
இலை மலர்ந்தால் ஈழம் மலரும் என்றும்...., குறுநில மன்னர்களின் அராஜகங்களை ஜெயலலிதா என்ற இரும்புப் பெண்மணியால் மட்டுமே அடக்க முடியும் என்று பொய் பரப்புரை செய்தும்...
மக்களின் திமுக மீதான கோபங்களை அப்படியே அதிமுகவுக்கு ஆதரவு மனநிலையாக மடை மாற்றி அதிமுகவை 2011 சட்டமன்ற தேர்தலில் வெற்றி பெற வைத்தனர்..!
ஆனால் இந்த ஏழு ஆண்டு காலத்தில் இலங்கையில் தமிழ் ஈழம் மலர்ந்ததா என்பதற்கான விடை எதுவுமே இல்லை. ஈழத்தைக் கூட மலர வைக்க வேண்டாம், ஈழப் பிரச்சினையில் சம்பந்தப்பட்ட பேரறிவாளன் உள்ளிட்டோரை விடுவிக்கும் அதிகாரத்தை தமிழக அரசுக்கு உச்சநீதிமன்றம் வழங்கிய நிலையிலும் கூட, இன்று வரை அவர்களை விடுவிக்கும் அதிகாரம் மாநில அரசுக்கு இல்லை என்பதையும்...,
இங்கு தமிழகத்தில் ஜல்லிக்கட்டு தடையை நீக்கக் கூட எவ்வளவு பெரிய போராட்டத்தை முன்னெடுக்க வேண்டியிருந்தது என்பதையும்..., தமிழக கிராமப்புர, அடித்தட்டு வர்க்க மக்களின் மருத்துவப் படிப்புக் கனவில் மண் அள்ளிப்போட்ட மத்திய அரசிடமிருந்து அதை மீட்டெடுக்கும் உரிமை கூட மாநில அரசுக்கு இல்லை என்பதையும்..,
இப்படி நம் தமிழக மக்களுக்குத் தேவையான உரிமைகளையோ, பாதுகாப்பையோ கூட ஒரு மாநில முதல்வரால் போராடியோ, மன்றாடியோ கூட மத்திய அரசிடம் இருந்து பெற முடியாத நிலை தான் இருக்கின்ற போது, அடுத்த நாட்டு உள் விவகாரத்தில் இந்திய அரசாங்கமே கூட தலையிட முடியாத நிலையில், ஒரு மாநில முதல்வரான கலைஞரால் எப்படி நீதியை பெற்றுத் தர முடியும் என்பதை இப்பொழுது தான் மக்கள் உணர ஆரம்பித்திருக்கின்றார்கள்..!
இலங்கைப் பிரச்சினையில் இப்பொழுது தான் மக்களுக்கு உண்மையான புரிதலும் அதில் திமுகவோ கலைஞரோ எந்த துரோகத்தையும் ஈழத் தமிழர்களுக்கு இழைக்கவில்லை என்று தமிழக இளைஞர்கள் நம்ப ஆரம்பித்திருக்கும் நிலையில்...
திமுகவை மிகப் பெரும் ஊழல் கட்சியாக சித்தரித்த 2ஜி முறைகேட்டு வழக்கில்... எந்தவிதமான அடிப்படை ஆதாரமும் இல்லை என்றதோடு மட்டுமல்லாமல், அதில் எங்கே ஊழல் நடந்திருக்கின்றது என்ற கேள்வியையே நீதிமன்றம் கேட்டு, திமுகவின் முன்னால் மத்திய அமைச்சர் ஆ. ராசா அவர்களை முழுமையான நிரபராதி என்று விடுதலை செய்திருக்கின்றது.
அந்த தீர்ப்பு வந்து ஆறு மாத காலங்கள் ஆகியும் இன்று வரையிலும் மத்திய அரசு மேல் முறையீடு செய்யவில்லை என்பதே அது திமுகவுக்கு எதிராக பொய்யாக புனையப்பட்ட கட்டுக்கதை என்பது தெள்ளத்தெளிவாக மக்களுக்கு புரிந்து விட்டது...!
இப்படி திமுகவுக்கு எதிரானவர்களால் புனையப்பட்ட பொய்யான குற்றச்சாட்டுகளால் அதன் பலனைப் பெற்று ஆட்சிக்கு வந்த அதிமுகவின் கடந்த ஏழு ஆண்டுகால ஆட்சியில்....
எத்தனை லட்சம் வேலை இழப்புக்கள்?! எவ்வளவு பெரிய விலைவாசி ஏற்றம்?! எவ்வளவு அதிகமான ஊழல்கள்?! எவ்வளவு கேவலமானதொரு கேடுகெட்ட ஆட்சி?! எவ்வளவு கோமாளித்தனமான அமைச்சர்கள்?! எவ்வளவு முடக்கப்பட்ட திட்டங்கள்?! எவ்வளவு தாரை வார்க்கப்பட்ட உரிமைகள்?! எவ்வளவு அரச பயங்கரவாதங்கள்?! எவ்வளவு அசிங்கமான அரசியல் நிகழ்வுகள்?!
இவை அனைத்தையும் மக்கள் பார்த்துக் கொண்டு, தினம் தினம் மனம் புழுங்கித் தவிக்கின்றனர்..!
தமிழகத்தின் வளர்ச்சி என்பது திமுகழகம் ஆட்சியை விட்டு இறங்கிய 2011 முதல் முடங்கிப் போனது..! பெரிய தொழிற்சாலைகள் அனைத்தும் வேறு மாநிலங்களுக்கு படை எடுக்கின்றன. படித்து வெளியேறும் இளைஞர்களுக்கு வேலை இல்லை. பொறியாளர்களுக்கு மதிப்பில்லாமல் அந்தக் கல்லூரிகள் எல்லாம் காற்று வாங்குகின்றன. பணப் புழக்கம் என்பது அறவே இல்லை. நிர்வாகம் என்பது சுத்தமாகக் கிடையாது. இருக்கும் வரை சுருட்டுவது லாபம் என்று முதலமைச்சர் முதல் அனைத்து அமைச்சர்களும் அதிகாரிகளும் ஆடித் தீர்க்கின்றனர்.
யாரும் கோரிக்கையே வைக்காத, தேவையே இல்லாத சேலம் எட்டுவழிச் சாலை திட்டம் முன்னெடுக்கப்படுகின்றது. மக்கள் அனைவரும் எதிர்க்கின்ற ஸ்டெர்லைட் ஆலையை அரசாங்கம் பாதுகாக்கிறது. அதற்காக மக்களைச் சுட்டுக் கொல்கின்றது..! எங்கு பார்த்தாலும் லஞ்சம், எதிலும் ஊழல்...
முதல்வராக இருந்த ஜெயலலிதா மர்மமாக இறந்து போகின்றார். அவர் ஊழல் குற்றவாளி என்று உச்சநீதிமன்றமே தீர்ப்பளிக்கின்றது. உயிரோடு இருந்தால் அவர் அரசாங்கத்திற்கு 100 கோடி ரூபாய் அபராதம் கட்டிவிட்டு, சசிகலாவோடு சேர்ந்து சிறையில் கம்பி எண்ணிக் கொண்டிருந்திருக்க வேண்டும்..!
பொய்யாக புனையப்பட்ட 2ஜி ஊழலுக்கு எதிராக இந்த ஊழல் குற்றவாளிக்குத் தான் மக்கள் வாக்களித்தார்கள்... முதல்வராக தேர்ந்தெடுத்தார்கள் என்பது தான் இதில் வேதனை..!
மாநில அரசில் இவ்வளவு பிரச்சினை என்றால் மத்திய ஆட்சியிலோ மக்கள் வேதனையின் உச்சத்திற்கே சென்று... இப்பொழுது மன் மோகன் சிங்கை வானளாவ புகழ்ந்து கொண்டிருக்கின்றனர்..!
ஆக இப்படியான சூழ்நிலையில் தமிழகத்தின் இழந்த பொலிவை, வளர்ச்சியை, வளத்தை, உரிமைகளை மீட்டெடுக்க திமுகவால் மட்டுமே முடியும்.... அரை நூற்றாண்டு நாகரீகமான அரசியல்வாதி, ஆட்சி அதிகாரங்களில் இருந்திருந்தாலும் கறை படியாத கரங்களுடன், அடாவடி, அராஜகம், அத்துமீறல் என்ற எந்த குற்றச்சாட்டும் இல்லாமல், மக்களோடு மக்களாக பயணிக்கின்ற திமுகவின் தலைவர் தளபதியாரால் மட்டுமே முடியும் என்று மக்கள் காத்திருக்கின்ற நிலையில்....
இதைப் புரிந்து கொண்ட, உணர்ந்து கொண்ட காவிகள், இவரோடு கூட்டணி வைக்க எத்தனிக்கையில்.... அதை அவர் புறம் தள்ளிவிட்ட நிலையில்....
திமுகழகத்தை மீண்டும் அவதூறுகள் மூலம் அசிங்கப்படுத்தி, இன்னுமொரு முறை ஆட்சிக்கு வரவிடாமல் தடுத்திடும் நோக்கத்தோடு...
ஊடகங்களின் துணை கொண்டு அவதூறுகளைப் பரப்பி வருகின்றனர்..!
அதிலும் திமுக தலைமை மீது ஒரு சிறு துரும்பைக் கூட தூக்கிப் போட இயலாத நிலையில்.... ஒன்னரை கோடி உறுப்பினர்களைக் கொண்ட திமுகழகத்தின் ஏதாவது ஓரிரு நபர்கள் எங்காவது சொந்த காரணங்களுக்காக அடாவடியில் இறங்கினால்... அதை வீடியோ எடுத்து ஊடகங்களில் வைரலாக்கி.... திமுக ரவுடி கட்சி என்று மக்களிடையே பரப்புவதற்கு முனைகின்றனர்..!
அராஜகம், ரவுடித்தனம் என்றால் ஸ்டெர்லைட் போராட்டக்காரர்களை அரசே சுட்டுக் கொன்றதும், ஏர்போர்ட் காவல் நிலையத்தில் கட்சித் தலைவரான தமிழிசை ஒரு சாமானியப் பெண்ணுக்கு எதிராகப் பொங்கியதும்... தங்களை விமர்சித்த கௌரிலங்கேஷ் போன்ற பல பத்திரிக்கையாளர்களை சுட்டுக்கொன்றதும் போன்ற நிகழ்வுகளைத்தான் சொல்ல வேண்டும்..!
மாறாக தங்கள் கட்சியில் அடிப்படை உறுப்பினரோ அல்லது முன்னால் பொறுப்பாளரோ கூட பொது வெளியில் அடாவடி செய்தால் அவர்களை கட்சியை விட்டு நீக்குகின்ற தலைமையைக் கொண்டிருக்கும் திமுக எங்கே..?!
அதே சமயம் கட்சியின் தலைமையே ஊழல் வழக்கில் உச்சநீதிமன்றத்தால் தண்டிக்கப்பட்டும் அந்த ஊழல் குற்றவாளியில் புகைப்படத்தை அரசு அலுவலகங்களில் மாட்டி வைத்து, ஊழல் செய்வது தப்பில்லை என்று அரசு அதிகாரிகளுக்கு சொல்லாமல் சொல்லி ஊழல் செய்து கொண்டிருக்கும் அதிமுக எங்கே..?!
ஆகவே இந்த முறையும் தமிழக மக்கள் காவிக் கூட்டத்தின் சின்னச் சின்ன உணர்வுச் சீண்டல்களுக்கு அடிமையாகி வாக்குச் சாவடிக்குச் சென்றால், அதன் பிறகு இந்த தமிழகத்தை அந்த ஆண்டவனாலும் காப்பாற்ற இயலாது..!

இவர் அரசியல் சாணக்கியரா..?!

இயற்கையிலேயே தந்தையாகிவிட்ட...

இவரது தலைவரிடமிருந்து....

அவரது தமிழை இவர் வரமாக கேட்டிடவில்லை...

அவரது இலக்கிய ஆற்றலை இவர் வரமாகக் கேட்டிடவில்லை...

அவரது அபரிமிதமான பேச்சாற்றலை இவர் வரமாகக் கேட்டிடவில்லை...

அவரது கவிதைகள் ஆக்கும் திறனை இவர் வரமாகக் கேட்டிடவில்லை...

அவரது எழுத்தாற்றலை இவர் வரமாகக் கேட்டிடவில்லை...

அவரது திரைக்கதை அமைத்து, வசனங்கள் ஆக்கும் திறனையும் கூட இவர் வரமாகக் கேட்டிடவில்லை...

வேறு என்ன தான் வேண்டும் தனையனே...
இல்லை இல்லை... இந்த பேரியக்கத்தின் அடுத்த தலைவனாக பொறுப்பேற்கவிருக்கும் என் ஆகச் சிறந்த சீடனே....

கேள்... என்ன வேண்டும் கேள்... உனக்கு ஏதாவது வரம் தரவேண்டிய கடமை எனக்கிருக்கிறது... கேள்....

என்று... தன் தலைவன் கேட்டதற்கு இவர் இப்படித்தான் வரம் கேட்டிருப்பார் போலும்...!

அந்த இயற்கை என்னிடம், இவர் உனக்கு தந்தையாக இருக்க வேண்டுமா? அல்லது தலைவனாக இருக்க வேண்டுமா? இரண்டில் ஒன்றினை மட்டுமே அருள முடியும் என்று கேட்டால்...

நீங்கள் என் தலைவனாக இருக்கும் பேரினை மட்டுமே கேட்டிருப்பேன்...!

காலத்தின் நீட்சியில் இயற்கையும் எனக்கு அந்த வரத்தினை நல்கி விட்டதாகவே கருதுகிறேன்...!

இப்பொழுது நீங்கள் என்னிடம் கேட்கின்ற கேள்விக்கு... நான் ஒரே ஒரு வரத்தினை மட்டுமே உங்களிடமிருந்து கேட்பேன்... அது எதுவாயின்...

தாங்கள் மேலே பட்டியலிட்டுள்ள உங்களின் ஆற்றல்கள் அனைத்தினையும் ஒருங்கே திரட்டி... அதை தங்களிடமிருக்கும் இன்னுமொரு ஆற்றலான அரசியல் சாணக்கியத்தனம் என்ற ஒன்றினோடு இணைத்துத் தாருங்கள்.. என்பேன்....!

அப்படியே ஆகட்டும்... என்று தான் அந்த தலைவரும் தந்துவிட்டார் போலிருக்கிறது...!

உண்மை தான் இந்த நேரத்தில் இதைச் சொல்லித்தான் ஆக வேண்டும். தமிழக அரசியலில் மட்டுமல்ல... அகில இந்திய அளவிலேயே ஆகச் சிறந்த ராஜதந்திரியாக தளபதி மு.க. ஸ்டாலின் அவர்கள் திகழ்ந்து கொண்டிருக்கின்றார் என்றால் அது மிகையல்ல்ல. இதை வெறும் புகழ் வார்த்தைகளுக்காகச் சொல்லவில்லை...!

இரண்டே இரண்டு விஷயங்கள் போதும், இதை நிரூபிக்க...!

இந்தியாவில் எந்த மாநிலக் கட்சியானாலும், பிராந்தியக் கட்சியானாலும் சரி... தேசிய அளவில் இரண்டில் ஒரு தேசியக் கட்சியின் நட்போடு தான் செயல்பட்டாக வேண்டும், என்ற நிலையில்... அவர்களை நாடியே அல்லது சார்ந்தே தான் இருக்க வேண்டும் என்ற நிலையில்...

இத்தனைக் காலம், கூட்டணியிலும், கூட்டணி ஆட்சியிலும் இருந்த காலத்தில் கூட வந்து சந்திக்காத ராகுல் காந்தியும்,

அரசியலில் நேருக்கு நேர் எதிர்நிலை எடுத்து மிகப் பலமாக எதிர்ப்பரசியல் செய்து வரும் நிலையில்... பிரதமர் #மோடியும்...

கிட்டத்தட்ட சம காலத்தில்.... தங்கள் இயக்கத்தின் தலைமைப் பீடத்தை வந்து சந்தித்து ஆசி பெற வைக்கும் அளவிற்கு காய்களை நகர்த்தியிருக்கின்றார்... அல்லது... அந்த அளவிற்கு தனது மக்கள் செல்வாக்கினை உயர்த்தி வைத்திருக்கின்றார் என்று தானே அர்த்தம்..?!

கிட்டத்தட்ட இருபது வருடங்களாக போக்குக் காட்டிக்கொண்டு, திமுக ஆட்சிக்கு வரவிடாமல், மீண்டும் மீண்டும் ஜெயலலிதா அரியணை ஏற ராஜபாட்டை அமைப்பதையே தங்கள் கடமையாக செய்து வந்து கொண்டிருந்த, தமிழகத்தின் சிறு குறு கட்சிகள் அனைத்தினையும்.....

போட்டி போட்டுக்கொண்டு வந்து திமுகழகத்திற்கு ஆதரவளிக்கச் செய்த அந்த ராஜதந்திரம்... கிட்டத்தட்ட யாராலுமே கணிக்க முடியாத ஒன்று...!

அவர் எங்கு பேசினார்? யாரிடம் பேசினார்? எப்படிப் பேசினார்? யார் மூலமாகப் பேசினார்? இப்படி எந்த கந்தாயமுமே புரியாமல், பிடிபடாமல் அத்தனைபேரும் வரிசை கட்டி வந்து திமுகழகத்திற்கு ஆதரவளித்துச் சென்று கொண்டிருக்கின்றார்கள்...!

எந்த ஒரு நேர்மையான அரசியல் விமர்சகரும் இது எப்படி சாத்தியமாயிற்று என்று ஆச்சர்யத்துடன் யோசித்துக்கொண்டு தான் இருப்பார்கள். இது எப்படி சாத்தியமாகியிருப்பினும், இவ்வளவு பெரிய அரசியல் மூவ் என்பது, ஆகச் சிறந்த அரசியல் சாணக்கியர்களுக்கு மட்டுமே சாத்தியம் என்பதை அவர்களால் மறுக்க இயலாது.

ஒருவேளை அவர்கள் தளபதி மு.க. ஸ்ஸ்டாலின் அவர்களுடைய இந்த அற்புதமான அரசியல் நகர்வை பாராட்டாமல் கடந்து செல்வார்களேயானால்... அது நிச்சயமாக ஏதோவொரு காழ்ப்புணர்ச்சியின் காரணமாகவோ அல்லது எதாவது ஒரு பயத்தின் காரணமாகவோ இருக்கலாமே தவிர வேறொன்றுமில்லை..!

ஆனால் ஒவ்வொரு திமுகழக தொண்டனும், தங்களுக்கு ஆகச் சிறந்த தலைவன் ஒருவன் கிடைத்து விட்டான் என்று ஆனந்தக் கூத்தாட வேண்டிய தருணம் இது...!

வாழ்த்துக்கள் தளபதியாரே....!!

ஸ்டாலினை எப்படித்தான் வீழ்த்துவது..?!

அடுத்து தேர்தல் என்ற ஒன்று வந்தால் இவர் தான் வெல்வார் என்று எதிரிகளே ஏற்றுக்கொள்ளும் நிலை தான் இங்கிருக்கிறது..!

இவரை எப்படித்தான் வீழ்த்துவது?!

ஆட்சி அனுபவம் இல்லை என்று ஒதுக்கவும் முடியாது....

சட்டமன்ற உறுப்பினர், மாநகர மேயர், உள்ளாட்சி துறை அமைச்சர், துணை முதல்வர் என்று படிப்படியாக ஆட்சி அனுபவத்தை வசப்படுத்தியிருக்கிறார்...!

சிறந்த நிர்வாகி இல்லை என்றும் கூறிட முடியாது...

ஏற்றுக்கொண்ட அனைத்து பொறுப்புக்களையும் திறம்படச் செய்து, சம்பந்தப்பட்ட துறை அதிகாரிகள் முதற்கொண்டு, பயன் பெற்ற மக்கள் வரை அனைவரும் இவரது செயல்பாடுகளை பாராட்டித் தீர்த்திருக்கின்றார்கள்..!

ஊழல் கரை படிந்தவர் என்றும் வாதிட முடியாது...

இத்தனை பெரிய பொறுப்புக்களை வகித்திருந்தும், இதுவரையிலும் ஒரே ஒரு ஊழல் குற்றச்சாட்டை இவர் மீது கூறி ஒரு சின்ன வழக்கு கூட தொடுக்க முடியாத அளவிற்கு வெளிப்படையாகவும், நேர்மையாகவுமே வாழ்ந்திருக்கின்றார்...!

உழைக்கத் தயங்குபவர்.. சோம்பேறி என்றும் யாருமே கூறிட முடியாது...

ஒரு நாள் தவறாமல் மக்கள் பிரச்சினைகளுக்காவும், தமிழக நலனுக்காகவும், தமிழகமெங்கும் மக்களோடு மக்களாக சுற்றிச் சுழன்று கொண்டிருக்கும் ஒரே தமிழக தலைவர் இவர் தான் என்று தமிழகத்தின் சிறு குழந்தைகளுக்குக் கூட தெரியும்..!

இவர் வந்தால் தமிழகத்திற்கு நலன் பயக்கும் தொலை நோக்குத் திட்டங்கள் எதுவும் வந்திடாது என்றும் வாதிட முடியாது...

காரணம், சென்னை மெட் ரோ ரயில், நெம்மேலி கடல் நீர் குடிநீராக்கும் திட்டம், ஒக்கேனக்கல், ராமநாதபுரம் கூட்டு குடிநீர் திட்டங்கள், மகளிர் சுய உதவிக்குழு சுழல் நிதி திட்டம்... இப்படியாக எண்ணற்ற சமூகநல, மக்கள் நலத்திட்டங்கள் இவரது முழு முயற்ச்சியினாலும், உழைப்பினாலுமே வந்ந்துள்ளன என்பதை நாடே அறியும்..!

சரி.. அரசியல் நாகரீகம் தெரியாதவர் என்று சொல்லலாமா என்றால், அதுவும் முடியாது...

காரணம், சமகால அரசியல் எதிரிகளாக இருந்த போதே, இருக்கும் போதே ஜெயலலிதாவிடமும், மோடியிடமும் நேரில் சந்தித்து உரையாடக் கூடியவர் என்பதுகூட அதிசயமில்லை, இவரை அரசியல் ரீதியாகவும் தனிநபர் ரீதியாகவும் மிகக் கேவலமாக விமர்சிக்கும் வைக்கோவிடமே கண்ணியத்துடன் பழகக் கூடியவர் என்பதை மக்கள் அறிவர்..!

வழவழா கொழகொழா என்று உப்புச் சப்பில்லாமல் ஆட்சியை நடத்துவார் என்று யாரேனும் சொல்வார்களேயானால்...

இவர் பொறுப்பில் இருந்த போது துவக்கிய திட்டங்கள் அனைத்தையுமே, குறிப்பாக மெகா சைஸ் பாலங்களைக் கூட குறிப்பிட்ட காலத்திற்கு முன்னதாகவே முடித்து... அதிலும் திட்ட மதிப்பீட்டை விட குறைவான செலவிலேயே முடித்து சாதனை படைத்தவர். காரணம் அந்த திட்டங்களை தினம் தினம் அதிகாரிகளை அழைத்துச் சென்று பார்வையிட்டு துரிதப்படுதியது தான் என்று அந்தந்த பகுதி மக்களே எடுத்துச் சொல்வர்...!

அதெல்லாம் கிடக்கட்டும், அவர் குடும்ப அரசியல் செய்கிறார் என்று போட்டுவிடுவோம் என்றால்...

அவர் மகனோ, மகளோ கட்சியில் எந்தவொரு சிறு பொறுப்பில் கூட இல்லாமல், கட்சி செயல்பாடுகள் எதிலும் தலையிடாமல், தன் திரைத்துறையிலேயே படு பிஸியாக ஈடுபட்டு வருகிறார். ஸோ அதற்கும் வாய்ப்பில்லை..!

யோவ்... இப்டியே சொல்லிட்டிருந்தா எப்டிய்யா...?! வேற எப்படித்தான் அவரை களங்கப்படுத்தி... அவரிடமிருந்து வாய்ப்பை தட்டிப்பறிக்கிறது..?!

சார்... அதுக்கு ரெண்டு மூனு வழி இருக்கு சார்...!

சொல்லித்தொலைய்யாஆஆஆ?!

ஏற்கனவே மக்கள் கிட்ட அப்டி இப்டி பேச்சாகி, கட்சியிலேர்ந்து கட்டம் கட்டப்பட்டுள்ள அவர் அண்ணனை பேச வச்சி, அவர் கட்சிக்குள்ளாற வர்ற மாதிரி நம்ம ஊடகங்களை எல்லாம் ஊதி பெருசாக்க வச்சி, அதை நம்ம சேனல்கள்ல விவாதப் பொருளாக்கி.... மக்கள் கிட்ட இந்த செய்தியை கொண்டு போனா... மக்களும் அதை நம்பி... இவர் கிட்ட ஆட்சியைக் கொடுத்தா, திரும்பவும் பழைய மாதிரி குடும்ப அரசியல், பவர் பாலிடிக்ஸ் நடந்து, இவர் சுதந்திரமா செயல்பட முடியாம போயிடும்ன்னு நினைச்சு.... இவர் ஆதரவு நிலையிலேர்ந்து பின் வாங்க வாய்ப்பு இருக்கு சார்...!

ஹ்ஹா... சூப்பர் ஐடியாய்யா...! உடனே நம்ம ஆளுங்களுங்க கிட்ட சொல்லி அதுக்கு ஏற்பாடு செய்யச்சொல்லுய்யா...!

சரி... வேற என்னென்னா ஐடியா இருக்கு சொல்லு...!

சார்... அவர் வேட்டிக்கு பதிலா அடிக்கடி பேண்ட்டு போடுறாருன்னு சொல்லலாம் சார்...! கலைஞர் மாதிரி கவிதை பாட தெரியலன்னு சொல்லலாம் சார்...! அண்ணா மாதிரி அடுக்கு மொழியில பேச தெரியலன்னு சொல்லலாம் சார்...! பெரியார் மாதிரி பார்ப்பனர்களை இவர் காட்டமா திட்டுறது இல்லன்னு சொல்லி சிறுபான்மையினர் ஓட்டு இவருக்கு கிடைக்காம செஞ்சுடலாம் சார்...!

பரவால்லய்யா.... இதெல்லாம் ரொம்ப மொக்கையா இருந்தாலும்... இதையெல்லாம் நம்ம மீம்ஸ் கிரியேட்டர்ங்க கிட்ட கொடுத்து அடிச்சிவிடச்சொன்னா.... இதுக்காக தொகுதிக்கு பத்து இருவது ஓட்டு அவருக்கு குறையும் தானே...!?

ஆமா சார்...!

அப்ப இதையெல்லாம் உடனே முன்னெடுக்க ஆரம்பிச்சிடுங்க....! இப்புடியெல்லாம் முக்குனாதாம்ப்பா... தொகுதிக்கு மூவாயிரம் ஓட்டாவது நமக்கு தேறும்..!

தீரன் அதிகாரம் ஒன்று... விமரசனம் மாதிரி..!

சதுரங்க வேட்டை எனக்கு பிடித்த படங்களில் ஒன்று, அதன் இயக்குனர் வினோத்தின் இயக்கத்தில் வந்துள்ள படம் என்பதால், நேற்று குடும்ப சகிதம் மாயவரம் ரத்னா தியேட்டரில் ஆஜர்..!

கடந்த சில ஆண்டுகளாக தமிழில் வெறிப்பிடித்த சினிமா ரசிகன் ஒருவனுக்கான படம் வரவேயில்லை என்பது தான் என் கருத்து. அதிலும் இப்போ ஐந்தாறு வருடங்களாக ஒரு குரூப்... சினிமான்னாலே இப்படித்தான் என்று தமிழர்களை எல்லாம் சினிமா மோகத்திலிருந்து வெளியெ இழுத்துப் போட்டுக்கொண்டிருக்கும் வேலையை கண கச்சிதமாக செய்து கொண்டிருக்கும் வேலையில்...

இதற்கு முன்பாக நான் பார்த்த சற்றேரக் குறைய 100 தமிழ் புது படங்கள் எதுவுமே அதி தீவிர சினிமா ரசிகனான என்னை முழுமையாக திருப்திப்படுத்திடாத நிலையில்... தமிழ் சினிமா உலகின் எதிர்காலம் பற்றிய நம்பிக்கையற்ற கவலையில் இருந்த நேரத்தில் தான்...

நேற்று இந்தப்படமும் அதில் ஒன்றாகத்தான் இருக்கும் என்ற அங்கலாய்ப்போடு தான் தியேட்டரில் படம் பார்க்க ஆரம்பித்தேன்...!

என் நம்பிக்கையை பொய்யாக்கமல், படமும் முதல் கால் மணி நேரத்திற்கு வழமையான பெரிய ஈர்ப்பில்லாத காதல் காட்சிகளுடனும், மொக்கை ஜோக்குகளுடனும் கடந்த நிலையில்....

ரன்வேயில் காமாஞ்சோமான்னு உருட்டிக்கிட்டிருக்கும் விமானம், எதிர்பாராத நேரத்தில் திடுக்கென்று வேகம் கூட்டி டேக் ஆஃப் ஆகி அதிர்ச்சியும், பரபரப்பும், ஒரு வித பயத்தையும் கூட்டி, நம்மை இனம் காண முடியாத ஒரு பரவசத்தில் ஆழ்த்துமே.... அதேப் போன்று தான்.. இது வேற லெவல் படம்... என்பதை அழுத்தமாக பதிவு செய்கிறது.

முரட்டுத் தனமான கொலைத்தாக்குதல்களுடன் கூடிய கொள்ளைகள்... எந்த தடயமும் கிடையாது, சாட்சியும் கிடையாது, பாதிக்கபடுவதோ, இதைக் கண்டுபிடித்தே ஆக வேண்டும் என்ற அழுத்தத்தை ஏற்படுத்தக் கூடிய மதிப்பு மிக்கவர்களும் கிடையாது...

எல்லாவற்றுக்கும் மேலாக சம்பவங்கள் நடப்பது அனைத்துமே இன்றைக்கு இருப்பது போல, தொலைத்தொடர்பு வசதிகளும், மக்களிடம் பிரச்சினைகளைக் கொண்டு சென்று அரசாங்கத்திற்கு அழுத்தம் கொடுக்க வைக்கும் சமூகவலைத்தளங்களும் இல்லாத, அது பற்றி தெரியவே தெரியாத காலக்கட்டம்...!

இதை வைத்துக்கொண்டு, டி எஸ் பி லெவலில் இருக்கும் ஒரு இளம் போலீஸ் அதிகாரி துப்புத்துலக்கி, அட்வென்ச்சர்ஸ் செய்து, இந்தியா முழுக்க தடம்பத்திருக்கும், எதற்குமே கவலை கொள்ளாத, நாடோடித்தனமான, பெரிய சொகுசு வாழ்க்கை வாழாத... கூட்டத்தையும் அதன் தலைவனையும் அழித்தொழித்து சட்டத்தின் முன் நிறுத்துவது தான் இந்த படத்தின் படா ஒன் லைன்...!

பருத்தி வீரனுக்குப் பிறகு கார்த்தியின் மேல் ஈர்ப்பே இல்லாமல் அல்லது பிடிக்காத நிலையே இருந்த நேரத்தில் இந்தப் படம் அவர் மீதான ஈர்ப்பை மீண்டும் உருவாக்கிவிட்டிருக்கிறது..!

மெர்ஸல் படம் பார்த்த பிறகு தான் தமிழ் சினிமாவின் எதிர்காலம் பற்றிய மிகப்பெரிய பயம் என்னுள் தொற்றிக் கொண்டுவிட்டது. காரணம், எந்த கலை, கதை, ஞானம் பற்றிய அறிவுமே இல்லாத ஒரு இயக்குனரின் பின்னால் வேறு வழியே இல்லாமல் மாஸ் ஹீரோக்கள் மாட்டிக்கொண்டு விட்டார்களே என்ற கவலை தான் அது...! பத்து படத்தோட கதையை, காட்சிகளைத் திருடி எடுப்பது தான் இனி தமிழ் சினிமாவாக இருக்குமோ என்ற பயம் கூட வந்து விட்டது...!

அந்த பயத்தை ஒரு நேர்மையான தமிழ் சினிமா ரசிகனின் மனதில் இருந்து இயக்குனர் வினோத் பிடுங்கி எறிந்திருக்கின்றார் என்று தான் சொல்வேன்..!

ராஜஸ்தானின் ஒரு பாலைவன கிராமத்தில் கொள்ளைக்காரர்களை சுற்றி வளைக்க, அந்த கிராமமே இந்த போலீஸ் கூட்டத்தை சுற்றி வளைத்து ரவுண்டு கட்ட.... அதிலிருந்து அதிரி புதிரியாக கார்த்தி அன் கோ தப்பிக்கும் அந்த சீன் மரண மாஸ்...! தமிழ் சினிமா எதிலுமே நான் இதுவரை பார்த்திராத அதகளம் அது...! அந்த காட்சிகளில் எல்லாம் இசையமைப்பாளர் ஜிப்ரான்... இது தான் பின்னனி இசையின் இலக்கணம் என்று புது இசையமைப்பாளர்களுக்கு பாடம் எடுத்திருக்கின்றார்...!

கேப்டன் பிரபாகரன் போன்ற படங்கள் எல்லாம் தமிழில் இனி சாத்தியமே இல்லையா.... ராஜமௌலி போன்ற தெலுங்கு இயக்குனர்களின் தமிழ் டப்பிங் பாகுபலி படங்களைப் பார்த்துத்தான் இனி சினிமா ஆசையை தீர்த்துக்கொள்ள வேண்டியிருக்குமோ என்ற என்னைப்போன்றோரின் கனவுகளை வினோத் இப்படம் மூலம் தகர்த்தெரிந்திருக்கின்றார்.

கேப்டன் பிரபாகரன் போன்ற படங்களுக்கு விஜயகாந்த்தின் பொருளாதார பின்புலம் இருந்து அப்போவே அப்படி பிரம்மாண்டம் காட்ட முடிந்திருக்கின்றது என்பது உண்மையானாலும், இந்த படத்தில் வரும் போலீஸுக்கு கொடுக்கப்படும் ரேஷன் தொகையினைக் கொண்டு இந்தியா முழுவதும் அலைந்து திரிந்து, டப்பா வேன்களையும், சுயசமையல் சாப்பாட்டினையும் வைத்துக்கொண்டு ஆகப்பெரிய பரம்பரை கொள்ளைக் கூட்டத்தை பிடித்தது போலத்தான்...

இப்படத்தில் காட்டியிருக்கும் பிரம்மாண்டத்திற்கு தயாரிப்பாரின் முதலீடு ரேஷன் தொகை என்றே தோன்றுகிறது.... ! இந்த இயக்குனருக்கெல்லாம் ராஜமௌலியின் தயாரிப்பாளர்கள் கிடைத்தால் தீரன் அதிகாரம் இரண்டை பத்து பாகுபலிக்கு இணையாக இந்திய சினிமாவுக்கு தமிழ் திரையுலகின் சார்பாக கொடுப்பார் என்று சத்தியம் செய்கிறேன்...!

இரண்டாம் பாதியில் வட மாநிலங்களின் பாலை வனங்களிலும், பொட்டல் வெளிகளிலும் ராஜபுதனத்து கால வரலாற்றுப் பின்புலத்தோடும், மொகலாயர் காலத்து நிகழ்வுகளோடும், ஆங்கிலேயர்களின் ஆட்சிமுறை நேர்க்கோட்டின் அழகினையும்... அழகியதொரு கதைச்சொல்லியாக, சாண்டில்யன் கதைகளைப் போன்று, நிகழ்கால படத்தின் காட்சிகளை நம் மனதில் இன்னொரு பின்புல சரித்திர மனப்பதிவுகளோடு கொள்ளைக்காரர்கள் பயணிப்பதை பார்வையாளர்கள் மங்களில் ஊடுறுவச் செய்து.... படத்தோடு ஒன்ற வைத்து, அற்புதமாக படமாக்கியிருக்கின்றார் இயக்குனர்...!

தமிழ் சினிமாவுக்கு அடுத்த நாசர்...   போஸ் வெங்கட்டாகத்தான் இருப்பார் என்று நம்புகிறேன். உடல் மொழியை இன்னும் கொஞ்சம் மெறுகேற்றி முழு ஈடுபாட்டோடு இறங்கினால், நிச்சயம் அவர் நாசரின் இடத்தைப் பிடிப்பார்..!

இல்லாத பாகுபலி வரலாற்றை இவ்ளோ பிரம்மாண்டமாக தரமுடியும் என்றால், வரலாற்றோட்டு பின்னிப்பிணைந்த இச்சம்பவங்களை இதைவிட நூறுமடங்கு பிரம்மாண்டமாக ஒரு பெரிய தயாரிப்பாளர் கிடைத்தாலும் வினோத்தால் படமாக்க முடியும்...!

விஜய் அஜித் போன்றோர் இவர் கைகளைப் பற்றிக்கொண்டு கைக்கட்டி வேலை செய்தால் அடுத்த பத்தாண்டுகளுக்கு மாஸ் ஹிட்டோடு சம்பாதிக்க முடியும்...!

படத்தில் குறையே இல்லையா என்றால்... நிச்சயம் இருக்கு...! இரண்டரை மணி நேரம் படம் பார்க்கும் பலர்... கிட்டத்தட்ட ஒன்னரை மணி நேரமாவது இயல்பாக சாய்ந்து உட்கார முடியாமால் சீட்டு நுனியிலும், அவ்வப்பொழுது கை கால்களை எல்லாம் முறுக்கிக் கொண்டும்.... டென்ஷனை ஏற்றிக்கொண்டும் இருக்க வேண்டியிருப்பதால்... அதன் காரணமான உடல் உபாதைகள் தான் இப்படத்தின் ஆகப் பெரிய குறை என்பேன்..!

நல்ல படம்ன்னா சில குறைகளையும், லாஜிக் மீறல்களையும் தள்ளி வச்சிட்டு பார்க்கணும்ங்கறதும்... நூத்துல தொண்ணூறு பசங்களுக்கு அஞ்சுலேர்ந்து பத்து வயசுக்குள்ள வர்ற லட்சியக் கனவுகளில் நிச்சயம் ஒரு போலீஸ் ஆஃபீஸர் இருப்பார் என்பது போல.... அந்த போலீஸ் ஆஃபீஸரை இங்கே நீங்கள் முழுமையாக காணலாம் என்று சத்தியம் அடித்துச் சொல்லமுடியும்..!

இதற்கு மேல் இந்த படம் பற்றி காட்சிக்கு காட்சி விமர்சனத்தை எழுதினால் அது போரடிக்கும் என்பதால்... தமிழ் சினிமா ரசிகர்கள் திரையரங்கம் சென்று இந்த சுகானுபாவத்தை அனுபவிக்கும் படியும்... அதன் மூலம் தமிழ் சினிமாவை வாழ வைக்கும் படியும் கேட்டுக்கொள்கிறேன்..!

மாயவரம் தேர்...

எங்க ஊர் பெரிய கோவில் தேர் ரெடியாகிட்டிருக்காங்க...! எங்க ஊர் தேரினை உயிரும், உணர்வும் கலந்த சக ஊர்வாசியாகவே நாங்கள் பார்ப்பதால் தான் இப்படிச் சொல்கிறேன்..!

ஒரு பக்கம் இவிங்களுக்கு அலங்காரம் நடக்குது.... 

கோவிலுக்குள்ள சாமி - அம்பாளுக்கு (அவயாம்பாளுக்கு) அலங்காரம் நடந்துக்கிட்டிருக்கு... 

நாலு வீதிலயும் சைடுல நின்னு எட்டிப்பாக்குற மரங்களோட கிளைகள் எல்லாம் கழிக்கப்படுது... 

ரோட்டுல இருக்குற குண்டு குழி எல்லாம் கப்பி போட்டு நிரப்படுது... 

மாயவரத்து பொண்ணுங்க எல்லாம் பீரோல இருக்குற தாவணிய எடுத்து வெளில வச்சு, மேச்சிங் பிளவுஸ் தேடிக்கிட்டிருக்கு.... 

பொடியனுங்க எல்லாம் சின்னச்சின்ன விளையாட்டு சாமான், திண்பண்டங்கள் வாங்க காசு தேத்திக்கிடிருக்காய்ங்க... 

வயசு பசங்க எல்லாம் முகத்துக்கு ஃபேஷியல் போடுறது, தாடிய டிரிம் பண்றது, கிராப்பு வெட்டுறது, பைக்கை சரி பண்றதுன்னு பிஸியா இருக்காங்க... 

வயசானவங்க எல்லாம் சுத்தபத்தமா கோவிலுக்கு போக ரெடியாகிட்டிருக்காங்க.... 

என்னைய மாதிரி ஆளுங்க எல்லாம் கூட்டத்துக்கு முன்னாடி முழுசா தேரை ஒரு தரம் பாத்துடனும்ன்னு வந்து ஃபோட்டோ எடுத்திட்டிருக்காங்க...

இதுக்கு நடுப்புற மேகங்கள் எல்லாம் கொஞ்சம் கொஞ்சமா தேர் பார்க்க வந்து கூடிக்கிட்டிருக்கு.... கொஞ்சம் உணர்ச்சிவசப்பட்டு கண்ணீர் விட்டாலும் ஆச்சர்யப்படுறதுக்கில்லை...!

காவிரி ஆத்துக்கு இந்தப்பக்கம் வந்தா வள்ளலார் கோவில் தேர், பெருமாள் கோவில் தேர் எல்லாம் ரெடியாகிட்டிருக்கு....

மாயவரமே பரபரப்பா இருக்கு...! இது தான் வருஷா வருஷம் இங்க நடக்குற செம்மையான செலிப்ரேஷன்...!

ஹாங்... இன்னோன்னு.... 

இன்னிக்கு தேர் முடிஞ்சோடுன தான் நாளைக்கு மாயவரத்துல உண்மையான காவிரி புஷ்கரம் நடக்கும்...! ஆன்மீக அன்பர்கள் மட்டுமல்ல.... ஆனந்தத்தை விரும்புபவர்கள் அனைவரும் மாயூரம் வருக...!

அப்படியே காவிரி தாயையும் நாளை முழுக்கு நேரத்திற்குள் மாயூரம் வந்துவிடும்படி அழைக்கின்றோம்...!  ஏன்னா இந்த நிமிடம் வரை இவ்ளோ மழையிலயும் காவிரி இங்கே காய்ந்து தான் கிடக்கிறது...!

சசி தப்புன்னா... ஜெயாவும் தப்பு தானே?!

இந்தியாவிலேயே ஆகப் பெரிய ஊழல்வாதியாக ஜெயலலிதா இருந்ருந்திருந்தால் மட்டுமே....

அவரது பினாமியாக இருந்த சசிகலாவின் குடும்பத்த்தினருக்குச் சொந்தமான நூஊஊஊஊத்தித் தொண்ணூறு இடங்களில் ரெய்டு நடத்த முடிகிறது...!

அப்படிப்பட்ட ஊழல் குற்றவாளியான ஜெயலலிதாவின் படத்தை அரசு அலுவலகங்களில் இருந்து உடனடியாக அகற்ற வேண்டும். அது முடியாது என்றால் சசிகலா குடும்பத்தினர் குற்றமற்றவர்கள் என்று அறிவித்து இந்த ரெய்டு நடவடிக்கைகளை நிறுத்தி விட்டு... முடிந்தால் சசிகலாவையும் விடுதலை செய்துவிட வேண்டும்...!

அதாவது...

சசிகலா தப்புன்னா.... ஜெயலலிதாவும் தப்பு...!

ஜெயலலிதா சரின்னா.... சசிகலாவும் சரி...!

இவர் செயல் தலைவரா... அல்லது செயல் முதல்வரா..?!

நேற்று முன் தினம் முழுவதும் சென்னை மழை நிவாரணப் பணிகளை பார்வையிட்டு வேகப்படுத்துகிறார்...

அங்கிருந்து கிளம்பி மதுரை வந்து, நேற்று காலை பண மதிப்பிழப்பு கருப்பு தின ஆர்ப்பாட்டத்துல கலந்து கொண்டு ஒரு மாபெரும் கூட்டத்தில் உரையாற்றுகிறார்...

அங்கிருந்து கிளம்பி தஞ்சாவூருக்கு வந்து, அங்கு திறப்பதற்கு தயாராக இருக்கும் புது பாலத்தில் ஏற்பட்ட விரிசலை ஆய்வு செய்து அம்பலப்படுத்தி ஆட்சியாளர்களை அலறவிட்டு மக்களை ஆபத்திலிருந்து காப்பாற்றுகிறார்...

அங்கிருந்து புறப்பட்டு... 

சம்பா பயிர் நடப்பட்டு  பத்துப்பதினைந்து நாட்கள் ஆன நிலையில், கடந்து பத்து நாட்களாக தொடர்ந்து பெய்யும் கனமழையால் அவை அனைத்தும் மூழ்கிப்போய், விவசாயிகள் விக்கித்து நிற்கும், திருவாரூர், நாகை மாவட்டங்கள் முழுவதும்... 

...பாதித்த வயல்வெளிகளையும், விவசாயிகளையும் நேரடியாக சந்தித்து ஆறுதல் கூறி நிவாரணம் பெற்றுத்தர உறுதியளித்து, அதற்கான போராட்டங்கள், ஆர்ப்பாட்டங்களுக்கு கட்சியினருக்கு அறிவுரைகள் வழங்கி... தொடர்ந்து இரவு 9 மணியைக் கடந்தும், பாதிக்கப்பட்ட மக்களிடம் குறைகளை கேட்டு, அவர்களுக்கு கட்சியினர் மூலம் நிவாரணப் பொருட்களை வழங்கியவாறும் பயணித்துக் கொண்டிருக்கின்றார்...!

திமுகவினர் அவரை தங்கள் கட்சியின் செயல் தலைவராகத்தான் நியமித்திருக்கின்றார்கள்...

ஆனால் காலமும், மக்களும் அவரை இன்றைக்கு தமிழகத்தின் செயல் முதல்வராகவே மாற்றிவிட்டிருக்கின்றது..!

இவருக்கும் வயது 64 ஆகின்றது... ஆனால் நேற்று முன் தினம் ஒருவருக்கு 64 வயது ஆகி அந்த நாளையும் தமிழகத்தின் ஒட்டுமொத்த மீடியாவும் கொண்டாடித் தீர்த்து, அவர் முதல்வர் ஆவாரா மாட்டாரா என்று கேள்வி எழுப்பி, முதல்வர் ரேஸில் கிட்டத்தட்ட முந்துவதாகவெல்லாம் பில்ட்டப் கொடுத்துக் கொண்டிருக்கின்றார்கள்.

இதே மீடியாக்கள் ஜெயலலிதாவுக்கும் இப்படி பில்ட்டப் கொடுத்துத்தான் தமிழகத்தை இன்றைக்கு கெடுத்துக் குட்டிச்சுவராக்கி வைத்திருக்கின்றார்கள்.

நியாயமாக பார்க்கப்போனால்..

மக்கள் பிரச்சினைகளுக்காக மட்டுமே தொடர்ந்து இப்படி தமிழகம் முழுக்க பயணித்து ஆட்சியாளர்களை வேலை வாங்கிக் கொண்டிருக்கும்... தமிழகத்தின் ஆகப்பெரிய கட்சியின் செயல்தலைவர் பற்றி... அவரது இந்த இடையறாத உழைப்பினைப் பற்றி இந்த ஊடகங்கள் விவாதங்கள் நடத்தியிருக்க வேண்டும். அவரது உழைப்பினை வெளிச்சம் போட்டுக்காட்டி இந்த ஆட்சியாளர்களை இன்னும் அலற விட்டு வேகமாக வேலை செய்ய வைத்திருக்க வேண்டும். அது தான் ஊடக தர்மம்..!

ஆனால் இந்த ஊடகங்கள் அதையெல்லாம் செய்யாது. அவர்களுக்கு சன் டீவியின் சீரியல்களுக்கும் மற்ற பொழுது போக்கு சேனல்களுக்கும் போட்டியாக தங்கள் செய்திகளையும் கவர்ச்சியாக மக்களிடம் சேர்க்க வேண்டும். அதற்காக சினிமா பிரபலங்கள் விடும் மூச்சுக்காற்றை ... பின்பக்கக் காற்றையும் கூட செய்தியாக்குவார்கள்...!

மக்கள் தான் கொஞ்சம் தெளிவாக இருக்க வேண்டும். இந்த முறை திமுகவை கை விட்டால், பிறகு தமிழகத்தை யாராலும் காப்பாற்ற முடியாது...! பீகார், உபியை விட கேவலமாக மாறிவிடும் அபாயம் இருக்கின்றது. கவர்ச்சி அரசியலையும், சாதி அரசியலையும், தமிழர்கள் கொஞ்சகாலத்திற்கு தள்ளி வைக்க வேண்டும்..!

மோடியின் கலைஞர் தரிசனம்... யாருக்கு லாபம்?!

சென்னை வந்த பிரதமர் மோடி தலைவர் கலைஞரை சந்தித்தது பற்றிய ஆயிரம் ஹேஷ்யங்கள் உலவினாலும்...,

இன்றைய இந்த நிகழ்வின் மூலம் உடனடி பலனை அறுவடை செய்தது மோடியும், பாஜகவும் மட்டுமே..!

இந்த சந்திப்பு நிகழாமல் இருந்திருந்தால், இணையத்தில் பலமான தளமமைத்து செயல்படும் ஒரு லட்சத்திற்கும் சற்று கூடுதலான திமுகவினர்... இந்நேரம், மோடியின் ஒவ்வொரு அசைவையும், அவரது பேச்சுக்களையும்..., அவருக்கும் அதிமுக ஆட்சியாளர்களுக்கும் இருக்கின்ற நெருங்கிய தொடர்புகளையும் புட்டுப் புட்டு வைத்து, நீட், இந்தி திணிப்பு, மீத்தேன், ஜி எஸ் டி, பண மதிப்பிழப்பு... இப்படியாக மோடியின் ஒட்டுமொத்த தோல்விகளையும் மீண்டுமொரு முறை தெளிவாக புள்ளிவிவரங்களுடன் பட்டியலிட்டு மக்கள் மன்றத்தில் வைத்து, இணையம் முழுக்க வைரலாக்கியிருப்பர்.

ஏற்கனவே தமிழக அதிமுக ஆட்சியாளர் மீது மக்கள் கடும் கோபத்தில் இருக்கின்ற நிலையில்... அதிமுக சார்பு தந்தி டீவியின் கருத்துக்கணிப்பிலேயே திமுகவுக்கு ஆதரவாக 55 சதவிகித மக்கள் இருப்பதை சுட்டிக்காட்டிய நிலையில்.... அந்த ஆட்சியாளர்களே... மோடி தான் தங்களைக் காப்பாற்றும் கடவுள் என்று மேடை போட்டு பேசி வரும் நிலையில்....

அதே அடையாளத்தோடு மோடி இங்கு வந்து சென்றால், அதிமுக ஆட்சியின் மீது பொது மக்களுக்கு இருக்கின்ற அத்தனை கோபங்களும் மோடியின் மீது ஒட்டு மொத்தமாக இறக்கி வைக்கப்பட்டிருக்கும். அதற்கு இணையதள திமுகவினரும் பக்காவாக அடித்தளம் அமைத்துக் கொடுத்திருப்பார்கள்.

குஜராத்திலேயே பாஜக அடிவாங்கப்போவதை இந்தியா டுடே கருத்துக்கணிப்பு தெளிவாக எடுத்துரைத்துள்ள இந்நேரத்தில், தமிழகத்தில் தன் கட்சி மீது கட்டமைக்கப்படும் மோசமான பிம்பம், நிச்சயமாக வட இந்திய மாநிலங்களில் இன்னும் மோசமாக எதிரொளிக்கும் என்பது மோடி வகையறாக்களுக்கு நன்றாகவே புரியும்..!

இந்த நிலையில் தான் தாங்கள் அதிமுகவுக்கும் அதன் நடப்பு ஆட்சிக்கும் பாதுகாவலர்கள் இல்லை என்பதை உறுத்திப்படுத்த... தலைவர் கலைஞரை சந்தித்த நிகழ்வானது, மோடிக்கு ஏற்படவிருந்த பெரிய பிம்ப சிதைப்பிலிருந்து அவரைக் காப்பாற்றியிருக்கின்றது..!

இதைத்தான் இன்றைய கலைஞர் - மோடி சந்திப்பின் முக்கிய விளைவாக நாம் பார்க்க வேண்டியுள்ளது..!

சரி... இதனால் திமுகவுக்கு என்ன பலன் என்று கேட்பீர்களேயானால்...

மோடிக்கு திமுகவினரால் கிடைத்த மதிப்பிழப்பு தடைக்கு கைம்மாறாக... அதிமுக ஆட்சியைக் கவிழ்த்து அல்லது கலைத்து தமிழகத்தை காப்பாற்ற பாஜக முன்வரும் என்பது தான்..!

கல்விக் கடனும்.. விஜய் மல்லையாவும் - சிறுகதை

இது வெறும் கற்பனைக் கதை மட்டுமல்ல. அன்றாடம் நம்மைச் சுற்றி நாம் அறியாமலேயே நடந்து கொண்டிருக்கும் எண்ணற்ற நிஜங்களின் ஒரு சாம்ப்பிள் தான்..!

@@@@@@@@@

ஐந்து ஆண்டுகளுக்கு மேல் இருக்கும் அந்தப் பெண்மணியை பார்த்து...

நன்றாக நினைவில் இருக்கிறது வங்கியில் ஒரு வேலை நிமித்தமாக மேலாளரை சந்தித்து பேசிக் கொண்டிருந்த போது தான், அந்தப் பெண்மணியைப் பார்த்தேன். கொஞ்சம் நெடிசலான தேகம். சராசரிக்கும் சற்று உயரம்.. பாதிக்கு மேல் நரைத்த கேசம்.., வயது 60ஐ தொட்டுக் கொண்டிருக்கலாம், அல்லது சமீபத்தில் கடந்து கூட இருக்கலாம். அன்றைக்கும், இதோ இன்று அழைத்து வந்திருக்கும் அதே மகளோடு தான் வந்திருந்தார்.

ரொம்ப நன்றிங்கய்யா.. என்று தாயும், மகளும் மேலாளரைப் பார்த்து கையெடுத்துக் கும்பிட, அந்தப் பெண் படக்கென்று அவர் காலில் விழுந்து வணங்கியது. மேலாளர் இளம் வயதினர் தான். அதனாலோ என்னவோ படபடத்தவாறு... அதெல்லாம் வேண்டாம்மா..! அரசாங்கம் கொடுக்க சொல்லியிருக்கு.... நாங்க கொடுத்திருக்கோம். அவ்ளோ தான், நல்லா படிச்சி முடிச்சி, இந்த லோனை கரக்ட்டா கட்டி முடிச்சா போதும், அது தான் நீ எனக்கும், இந்த வங்கிக்கும் செய்கிற நன்றியாக இருக்கும் என்று சொன்ன போது எனக்கும் கொஞ்சம் நெகிழ்ச்சியாகத்தான் இருந்தது.

அவர்கள் சென்றவுடன் தான், மேலாளர் விவரங்கள் சொன்னார். ஏழ்மையான குடும்பம் சார். பக்கத்துல தான் அவங்க கிராமத்தின் பெயரைச் சொன்னார். இங்கிருந்து 18 கிலோ மீட்டர் இருக்கும். அது ஒத்த பொம்பள... கணவர் இறந்த பிறகு, கொஞ்சூண்டு நிலம், ஆடு, மாடு, கோழி எல்லாம் வச்சிக்கிட்டு, மூனு பொம்பள புள்ளைங்களையும் கொஞ்சம் கொஞ்சமா கறையேத்திக்கிட்டு வருது.

மொதோ ரெண்டு பொண்ணுங்களும் செவிலியர் பயிற்சி படித்து, வேலைக்குச் சேர்ந்து... காதல் திருமணம் செய்து செட்டிலாகிட்டாங்க. இது தான் கடைக்குட்டி... இப்போ இது ஒரு பாரம் மட்டும் தாங்கிறதுனால, இதையாச்சும் நல்லா படிக்க வைக்கலாம்ன்னு ஆசை. +2 ல ஓரளவு நல்ல மார்க்கு வாங்கினதுனால, பக்கத்து டவுன்ல இருக்குற தனியார் இஞ்சினியரிங் காலேஜ்ல சீட்டு கிடைச்சிடிச்சி. காலேஜுக்கு தினமும் பஸ்ஸுல போய்ட்டு வந்துடலாம். ஆனா அதுக்கும், மத்த மத்த படிப்பு செலவையும் இவங்களே எப்படியாவது வர்ற வருமானத்தை வச்சி மேனேஜ் பண்ணிடுவாங்க. ஆனா வருஷா வருஷம் ஃபீஸ் தான் மலைப்பா இருக்குன்னு வந்து நின்னாங்க.

நாலு வருஷத்துக்கும் சேர்த்து கிட்டத்தட்ட ரெண்டு லட்சம் வருது. வெளில கடன் கேட்டு பழக்கம் இல்ல. ஒத்த பொம்பளையா நின்னு, புள்ளைங்கள உழைச்ச காசுலயே கொஞ்சம் கொஞ்சமா கரையேத்திக்கிட்டு இருக்கேன். சொந்த பந்தமா இருந்தாலும், பக்கத்து வீடு, எதுத்த வீட்டு மனுஷங்களா இருந்தாலும் யாருட்டயும் ஒத்த காசு கடனாவோ, உதவியாவோ போயி நின்னு கேட்டு எம் புள்ளைங்கள வளர்த்துடக் கூடாதுன்னு, என் புருஷன் செத்தப்பவே உறுதி எடுத்துக்கிட்டேன்.

இந்த பன்னெண்டு வருஷத்துல, என்ன வருதோ அதுக்குள்ளாற தான் செஞ்சிக்கணும்ன்னு, நெலப்பாடா இருந்து ஓட்டிட்டேன். அதுல இந்து பொண்ணுங்களுக்கு எல்லாம் பல நேரம் ஆசப்பட்ட துணி மணிங்கள கூட வாங்காம, நினைச்ச மாதிரி படிக்க வைக்காம கூட, என்னால என்ன முடியுமோ அத மட்டும் செஞ்சி, ஆனா... அவங்க பின்னாள்ல தன் சொத்த கால்ல நின்னு சம்பாதிச்சி வாழற மாதிரியான படிப்பை கொடுத்து ஆளாக்கி விட்டுட்டேன்.

இந்த கடைக்குட்டிக்கும், துணி மணியெல்லாம் ஆசப்பட்ட மாதிரி வாங்கி கொடுக்காட்டியும், படிப்பையாவது நல்லபடியா குடுக்கலாமேன்னு ஆசை... பேங்க்ல கல்விக் கடன் கொடுக்குறதா சொல்றாங்க... அதான் வந்தேங்க சார். கிடைச்சுதுன்னா பி ஈ படிக்க வப்பேன்... இல்லாட்டி நர்ஸிங் தான்னு சொல்லி கூட்டியாந்துருக்கேன் சார். அவளுக்கு நர்சிங் பிடிக்கலையாம், அதனால பி எஸ் ஸி சேர்க்கலாம்ன்னு இருக்கேன்.

அந்த அம்மா சொன்னத கேட்டோடுன, அந்த பேச்சுல ஒரு உண்மையும், தெளிவும் தெரிஞ்சிது சார். அதான் பேப்பர்ஸ் எல்லாம் கொண்டுட்டு வரச் சொல்லி ஒரே வாரத்துல சேங்க்‌ஷன் பண்ணி கொடுத்துட்டேன். அதுக்கு தான் நன்றி சொல்லிட்டு போறாங்கன்னு அவர் சொல்லிக் கொண்டிருக்கும் போதே... அவ்விருவரும் மீண்டும் உள்ளே நுழைந்தார்கள்.

காலேஜ்ல ஏதோ ஃபார்ம் கொடுத்து மேனேஜர் கிட்ட சீல் வச்சி கையெழுத்து வாங்கியாறச் சொன்னாங்க... அதை லோன் கிடைச்ச சந்தோஷத்துல மறந்துட்டு போயிட்டேன் சார்ன்னு இழுக்கவும்.. அதைக் கேட்டு வாங்கி கையெழுத்து போட்டு திருப்பிக் கொடுத்தவாறே... உங்களை பத்தித்தான் இவங்க கிட்ட பெருமையா சொல்லிக்கிட்டிருந்தேன்... என்று என்னைக் காட்டி அறிமுகப்படுத்தவே....

இருவரும் என்னை வணங்கினர். நானும் அவர்களை வணங்கி, ‘அம்மா’ன்ற வார்த்தைக்கு நீங்க தாம்மா உண்மையான தகுதியுள்ள பெண்மணின்னு சொல்லி, அந்தப் பெண்ணிடம், உங்க அம்மாவுக்கு சந்தோஷம் கொடுப்பது எப்படி உன்னுடைய முதல் கடமையோ... அதை விட முக்கியமானது, இதுவரை அவர்கள் கட்டிக் காப்பாற்றிய நாணயத்தையும், கௌரவத்தையும் காப்பாற்றுவது. அதுக்கு நீ செய்ய வேண்டியது, படிப்பைத் தவிர வேற எதுலயும் எண்ணத்தை வீணடிக்காமல், நன்கு படித்து உயர்ந்த நிறுவனத்தில் வேலைக்குச் சேர்வது தான்.. என்றவுடன், அந்தப் பெண்ணும் உற்சாகமாக தலை ஆட்டியவாறே... நிச்சயம் செய்வேன் சார் என்றது..!

நடுவில் ஓரிரு முறை அவர்களை வங்கியில் பார்த்திருக்கிறேன். அந்த அம்மாவும், புன்முறுவலோடு என்னை நலம் விசாரித்து ஓரிரு வார்த்தைகள் பேசுவார். அந்தப் பெண்ணின் படிப்பு பற்றி நானும் கேட்டு தெரிந்துகொள்வேன்.

வங்கியிலும் மேலாளர் இடமாற்றத்தில் வேறொரு ஊருக்குச் செல்ல, இன்னொருவர் பொறுப்பேற்றுக் கொண்டார்..

கடந்த ஆண்டு எங்கள் திருமண நாளை முன்னிட்டு, ரிங் எடுப்பதற்காக ஊரில் புதிதாக துவங்கியுள்ள நகைக் கடைக்கு மனைவியுடன் சென்ற போது தான் அதிர்ந்து போனேன்.

அந்தப் பெண்... அதே பெண் தான்...! கவுண்ட்டரில் நின்று விற்பனைப் பெண்ணாக நகைகளை வாடிக்கையாளருக்கு காட்டிக் கொண்டிருந்தார். என்னைப் பார்க்காமல் தவிர்த்து விட துடித்துக் கொண்டிருப்பதை உணர்ந்தவாறே... அதை... அந்த தவிப்பிலேயே தொடர அனுமதிக்கக் கூடாது என்ற எண்ணத்துடன், நேரடியாகச் சென்று... என்னம்மா சௌக்கியமா?! என்று கேட்டவாறே அவள் எதிரில் நின்றேன்.

என் மனைவியிடமும், இவர்களைப் பற்றி ஏற்கனவே சொல்லி வைத்திருந்த காரணத்தால், அந்தப் பெண்ணை அறிமுகம் செய்ய அதிக நேரம் தேவைப்படவில்லை. என் மனைவியும் சற்று அதிர்ந்தவளாய், நீ ஏம்மா இங்க வேலை பார்க்கறே?! என்று கேட்டவுடன், அந்தப் பெண்ணின் விழியோரத்தில் சட்டென நீர்த்துளி எட்டிப் பார்த்தது.

இதைத்தான் நான் எதிர்பார்த்தேன். அந்தப் பெண்ணுக்கு தன் பிரச்சினைகளில் இருந்து வெளியேற ஒரு ஐஸ் பிரேக்கிங் மொமண்ட் தேவை. அது என் மனைவியால் இலகுவாக கிடைத்து விட்டது. என்ன நடந்திருக்கும் என்பதை என்னால் அந்தப் பெண்ணை அந்த இடத்தில் பார்த்த கணத்திலேயே இலகுவாக உணர்ந்து கொள்ள முடிந்தது. ஆனால் அது அவளுடைய தவறு அல்ல, இந்த அரசாங்கத்தின் குற்றம் என்ற உண்மையை அவளுக்கு உணர்த்தி விட்டால், இனி யாரைப் பார்த்தும் வெட்கப்பட்டு பயந்து ஒழிந்து கொள்ளாமல், தான் எந்த வேலை பார்த்தாலும் அதை சந்தோஷத்துடன் முழு அர்ப்பணிப்புடன் செய்து, அந்தத் துறையில் அந்தப் பெண்ணால் முன்னுக்கு வர முடியும் என்று நம்பினேன்.

உண்மையில் ஒரு இஞ்சினியரிங் படித்த பெண்ணை நகைக்கடையில் வேலை பார்க்க வைத்திருப்பதற்கு, அரசாங்கமே வெட்கப்பட வேண்டும்... அவளுக்கான வேலை வாய்ப்பை அரசாங்கம் தான் உருவாக்கித் தந்திருக்க வேண்டும், மாறாக அவள் இதில் வெட்கப்பட ஏதுமில்லை என்று உணர்த்தி விட்டு வந்தேன். திரும்பி வரும் போது அந்தப் பெண்ணிடம் ஒரு தைரியம் குடிகொள்வதை புரிந்துகொள்ள முடிந்தது.

அதன் பிறகு இன்று தான் அந்தப் பெண்ணையும் தாயாரையும், வங்கியில் வைத்து பார்க்க நேர்ந்தது. நானே பேச்சை ஆரம்பித்தேன். அந்த அம்மா மட மடவென்று கொட்டித் தீர்த்து விட்டார்.

வருடா வருடம், ஃபீஸ்க்கு செக் வாங்கிச் சென்று கல்லூரியில் கொடுத்து... ஓராண்டு கடந்த நிலையிலேயே மாதாமாதம் வட்டியையும் சரியாக கட்டி வந்த நிலையில்... நான்காண்டு முடிந்த பிறகு, வேலை கிடைக்காமல் தான் அந்தப் பெண் மிகவும் அல்லாடியிருக்கின்றார். நூற்றுக் கணக்கான வேலைகளுக்கு அப்ளை செய்வது, பல இண்டர்வியூக்களுக்கு சென்னை, பெங்களூர் என்று சென்று வருவதாக, ஆறு மாதங்கள் அலைந்ததிலேயே, வங்கிக்கு வட்டி கட்ட முடியாத நிலை ஏற்பட்டுள்ளது.

சென்னையில் ஒரு சில இடங்களில் வேலை கிடைத்தாலும் சம்பளமாக பத்தாயிரம் தான் கொடுப்பேன் என்கிறார்கள். தனியார் ஹாஸ்டல், சாப்பாடு, மத்த மத்த செலவுக்கெல்லாமே ஆறாயிரம் ஆயிடுது தம்பி. மாசத்துக்கு ஒரு தரம் வீட்டுக்கு வந்துட்டு போனாலே, பஸ் செலவு அது இதுன்னு ஆயிரம் ஆயிடுது. பாக்கி மூவாயிரத்தை வச்சிக்கிட்டு என்ன பண்றது?

அது தான் கொஞ்சம் கூட யோசிக்காம, இங்க நகைக்கடைல ஆளு எடுக்குறாங்க.... ஆறாயிரம் சம்பளம்ன்னு சொன்னாங்க, பஸ்ஸு செலவு ஆயிரம் போனா கூட, ஐயாயிரம் மிச்சமாகும்ன்னு சொல்லி தான் அந்த கடைல சேர்த்து விட்டேன். பாவம் புள்ளயும் நான் பி ஈ படிச்சிருக்கேன் திமிறு காட்டாம அந்த வேலைல போயி சேர்ந்துட்டா, அதுலயும் ஆயிரத்தி ஐநூறு வரைக்கும் பெரிய பெரிய கம்பெனிக்கெல்லாம் இண்டர்வியூ போறது, அப்ளிகேஷன் போடுறதுன்னே ஆயிடுது... மாசத்துக்கு மூவாயிரத்தை பேங்க்ல கட்டிக்கிட்டிருக்கேன்.

நேத்திக்கி தான் பேங்க்லேர்ந்து நோட்டீஸ் வந்திச்சி... அதான் அவள ஒரு ரெண்டு மணி நேரம் பர்மிஷன் போட்டுட்டு இங்க கூட்டிட்டு வந்துருக்கேன். மேனேஜர் என்னென்னவோ சொல்றார். வட்டியோட சேர்த்து, ரெண்டு லட்சத்தி நாற்பது இருக்காம். உங்களை என் கூடப் பொறந்த தம்பியா நெனச்சித்தாம்பா சொல்றேன். கொஞ்சம் மேனேஜர்கிட்ட பேசி இத எப்படி செய்யலாம்ன்னு ஒரு வழிவகை செஞ்சிவுடுப்பா. உடனே கட்டணும்ங்கறார். அதுக்கு நிலத்தை வித்தாத்தான் சரிப்படும், அப்புடியே வித்தாலும் இவ்ளோ பணம் எல்லாம் தேறாது.... அதுவும் உடனே நடக்கற கதையா?! நான் வாங்குன பணத்தை இல்லன்னு சொல்ல மாட்டேன். என் தலைய அடமானம் வச்சாவது கட்டிடுவேன். ஆனா கொஞ்சம் அவகாசம் மட்டும் வாங்கிக் குடுங்க தம்பி

மேலாளரிடம் பேசினேன், பழைய மேலாளரிடம் ஃபோன் போட்டு அவர்களைப் பற்றி இவரிடம் சொல்லச் சொன்னேன். நான் வேண்டுமானாலும் ஷ்யூரிடி கையெழுத்து போடுவதாகச் சொன்னேன். அந்தப் பெண்மணி அவசரமாக குறுக்கிட்டு, வேணாம் தம்பி.. வேணாம்... அது மட்டும் வேணாம்... என் நிலம், ஆடு, மாடு எல்லாத்தையும் கூட வித்து குடுத்திடுறேன்.... ஆனா கடேசி வரைக்கும் யார் பண உதவியும் இல்லாம வாழ்ந்துடனும்ங்கற நெஞ்சுறுதிலேர்ந்து மாறிடக் கூடாது என்று சொன்னது.... எனக்கு பெரியதாக அதிர்ச்சியைக் கொடுக்கவில்லை... ஆனால் இந்த புது மேலாளர் சற்று ஆடித்தான் போனார்..!

இல்ல சார். டி ஓ ஆஃபீஸ்லேர்ந்து ஹெவி பிரஷ்ஷர். அதான் எல்லாருக்கும் நோட்டீஸ் அனுப்பிட்டேன். எப்டி பண்ணலாம்ன்னு சொல்லுங்க. நாங்களும் மனுஷங்க தான்.

அவர்கள் நிலயை சுறுக்கமாகச் சொல்லி, மாதம் நாலாயிரம் கட்ட முடியும்ன்னு சொன்னேன்.

வட்டியே மூவாயிரத்தி சொச்சம் வருது சார். பிரின்சிபிள்ல ஒரு ஐயாரமாச்சும் சேர்த்து கட்டிட்டு வந்தா எனக்கு எந்த பிரச்சினையும் இல்ல சார்.

அவங்க மாசம் எட்டாயிரம் கட்டுவாங்க சார். அதுக்கு நான் பொறுப்பு. அதுக்கு ஷெட்யூல் போட்டு குடுங்க. அவங்க மாசம் தவறாம கட்டுவாங்க...

அந்த பெண்மணி இடைமறித்து ஏதோ சொல்ல முற்பட், எதுவும் பேச வேண்டாம் வெளில வாங்க பேசுவோம்ன்னு விடுவிடுவென வெளியேறினேன்.

தம்பி இவள வேற இண்டர்வியூ செலவெல்லாம் வச்சிக்க வேணாம்ன்னு சொல்லி அந்த ஐயாயிரத்தை அப்புடியே கட்டிடலாம். நான் பருத்தி போடும் போது வருஷத்துக்கு ஒரு இருவதாயிரம் கட்டிடறேன்... இதுக்கு நடுப்புற அவளுக்கு சம்பளம் கூட கிடைச்சுதுன்னா, அதையும் சேர்த்து கட்டிடறோம் தம்பி.

நீங்க சொல்றத தாம்மா நானும் சொல்றேன்... அந்தப் பொண்ணு ஐயாயிரம், நிங்க சொல்றது மாசத்துக்கு கணக்குப் பண்ணினா ஆயிரத்தி ஐநூறு... பாக்கி மாசம் ஆயிரத்தி ஐநூறு தான் துண்டு விழுது...!

அதுக்கு எங்க தம்பி நான் போவேன்?! சொன்னா சொன்ன படி கட்டுனா தானா நாளை மறுநாள், இங்க மானம் மரியாதையோட வந்து போவ முடியும்?!

எனக்கு வேண்டிய நண்பரோட சின்ன கம்பெனி பக்கத்துல இருக்கு. பெண்கள் தான் அதிகம் வேலை செய்யறதால, உற்பத்தி மேலாளருக்கு நல்லா படிச்ச பொண்ணு இருந்தா நல்லாயிருக்கும்ன்னு போன வாரம் தான் சொன்னார். ஆம்பளைங்கள வச்சா நிறைய ப்ராப்ளம் வருது அதான் பெண்ணாக இருந்தால் நல்லது என்றார். அவர் எட்டாயிரம் சம்பளம்ன்னு சொல்லியிருந்தார். ஆனா பி ஈ படிச்ச பொண்ணு, பத்தாயிரம் குடுத்தாதான் வரும்ன்னு சொல்றேன். அதோட உழைப்புக்கு நான் கேரண்டின்னு சொல்வேன்... ஆனா நகைக்கடை மாதிரி அங்க ஏசி இருக்காது அதை விட வேலை கொஞ்சம் கடினமாத்தான் இருக்கும்... பட்.. சாயந்திரம் 6 மணிக்கெல்லாம் வேலை முடிஞ்சிடும். அதுக்கு மேல இருந்துச்சின்னா ஓவர் டைம் போட்டு குடுப்பாங்க... என்று சொல்லிக் கொண்டிருக்கும் போதே...

எனக்கு ஓக்கே சார்...! ஹார்ட் ஒர்க் ஒரு ப்ராப்ளமே இல்ல சார் எனக்கு. இதை விட நல்ல சம்பளம், நான் படிச்ச படிப்புக்கு கொஞ்சமாச்சும் சம்பந்தம் இருக்குறா மாதிரி வேலை... அதோட கம்பெனின்னாலே நல்லா வேலை செஞ்சா, எக்ஸ்பீரியன்ஸ் அதிகரிக்க அதிகரிக்க சம்பள உயர்வும் கிடைக்கும்... இங்க நம்ம ஊரு பக்கத்துலயே... டெய்லி இப்ப மாதிரியே வீட்டுக்கு போயிட்டு வந்திரலாம்.... வாங்குற சம்பளத்துல எட்டாயிரம் பேங்க்ல கட்டிட்டு... ஆயிரம் பஸ்ஸுக்கு போக, ஆயிரம் அம்மாக்கு குடுத்திடுவேன் சார்...!

எப்படியாச்சும் அந்த வேலைய வாங்கிக் குடுத்திடுங்க சார்..!

அந்த அம்மா கண்கள் பனிக்க என்னைப் பார்த்தார்...

நான் ஃபோனை எடுத்து நம்பரைப் போட்டேன்... ஹல்லோ... பரந்தாமன் நல்லாருக்கீங்களா?! நீங்க புரொடக்‌ஷன் மேனேஜருக்கு ஒரு கேண்டிடேட் கேட்டிருந்தீங்கள்ல?... பி ஈ படிச்ச பொண்ணு ஒன்னு இருக்கு. இருபதாயிரம் சம்பளத்துல் சென்னைல ஒரு வருஷமா ஒரு கார்ட்டன் பாக்ஸ் கம்பெனில புரொடக்‌ஷன்ல ஒர்க் பண்ணியிருக்கு..! அவங்க அம்மா இங்க பக்கத்துல கிராமத்துல தனியா இருக்கறதால, இங்கயே ஒரு நல்ல ஜாப் கிடைச்சா வந்துடலாம்ன்னு சொன்னுச்சி. எனக்கு ரொம்ப வேண்டியப்பட்டவங்க தான்.

அட்லீஸ்ட் 12 ஆயிரமாவது சேலரி இருந்தா இங்கயே இருந்துடுவேங்குது. ஆனா அருமையான டெடிகேடிவ் ஒர்க்கர். நல்ல ஷார்ப்.... உங்க ஞபகம் தான் வந்தது... என்ன சொல்றீங்க?!

நீங்க கேரண்டி கொடுத்தா ஓக்கே தான் ப்ரோ... பட்... இப்பத்திக்கு பத்தாயிரம் வேணா மாசம் தர்றேன்..! ஒரு ஆறு மாசம் வேலை செய்யட்டும். புரொபேஷனரி பீரியட் முடிஞ்சோடுன அவங்க கேக்குற மாதிரியே 12 ஆயிரம் பண்ணி கொடுத்திடுறேன். ஓகேவா? பேசிப் பாருங்க..!

சரி கேட்டுப் பார்த்துட்டு சொல்றேன்...!

@@@@@@@@@@

டெடிகேட்டட் டு : விஜய் மல்லையா...

காப்பி டு: மோடி மற்றும் ஜெட்லி..!

காப்பி டு: எஜுகேஷன் லோன் வாங்கிட்டு, கல்விக்கடனை ரத்து செய்வேன்னு வாக்குறுதி தந்த திமுகவுக்கு ஓட்டுப்போடாத குடும்பத்தினர்..!

ஓவர் டு:  கல்விக்கடனை வசூலிக்க ஆர்டர் பெற்றிருக்கும் ரிலையன்ஸ்..!