Saturday, January 17, 2015

ஐ!!!!! பைசா வசூல்...!!!!!

நேற்று ஒரு வழியாக ஐ படம் பார்த்தாச்சு....

என்னைப் பொறுத்தவரை ஒரு படத்தை நல்ல படம்ன்னு சொல்லனும்ன்னா அதற்கான தகுதியாக என்னைப் போன்ற சினிமா வாழ வேண்டும்...  என்று எண்ணுகிற சினிமா ரசிகனை தியேட்டரில் போய் உட்கார்ந்தது முதல் படம் முடிகிற வரை... நைட் ஷோவிலும் கொட்டாவி கூட விடாமல் வாயை பிளந்து பார்க்க வைக்க வேண்டும்....!!

அந்த வகையில் ஐ என்னைப் பொறுத்தவரை ஒரு நல்ல படம்...!!

தியேட்டர்ல செம கூட்டம். ஞாயிற்றுக் கிழமை வரை டிக்கெட் விற்றாகிவிட்டது. டிக்கெட் விலை ரூ. 250.  ஏசி இல்லாமல், சீட்டெல்லாம் உடைந்து கிழிந்து கிடக்கும், துப்புறவு இல்லாத தியேட்டரில் இந்த விலை கொடுத்து இந்தப் படத்தைப் பார்க்க ஐந்து நாட்களுக்கு ஃபுல் என்றால்...   தமிழ் நாட்டில் மட்டுமே இந்நேரம் இந்தப் படம் 150 கோடி வசூலை தாண்டியிருக்கும் என்பது என் சிற்றறிவு சொல்லும் கால்குலேஷன்...!!!  ஆக இந்தப் படம் வியாபார ரீதியிலும் ஒரு வெற்றிப் படமே...!!!

டைட்டில் போடும் போதே மாஸ் ஹீரோக்களின் படங்களுக்கு வரும் அளவிற்கான விசில் சத்தம் ஷங்கர் பெயர் வரும் போது வந்தது ஒரு பெரிய ஆச்சர்யம்.  அந்த விசில் சத்தங்களும், கைத்தட்டல்களும் படம் நெடுகிலும் படம் முடிந்து எழுந்து வரும் போது வரை வருவது தான் படத்தின் வெற்றி...!!!

எனக்கு உன் சமையல் அறையில் படமும் பிடிக்கும்....   இந்த ஐ படமும் பிடித்திருக்கிறது....!!   நூற்றுக்கு நூறு மார்க் வாங்குகிற மாணவனையும் பிடிக்கும்...  படிப்பு சரியா வராமல் ஸ்போர்ட்ஸில் கோல்ட் மெடல் வாங்குகிற மாணவனையும் பிடிக்கும்...!!   இவனிடம் விளையாட்டுத் திறன் இல்லை என்று திட்ட மாட்டேன்.... அவனுக்கு படிப்பு வரவில்லை என்று காதைப் பிடித்து திருகவும் மாட்டேன்...!!!  அவரவருக்கான தளத்தில் சிறப்பாகச் செய்கின்றார்களா என்பதில் மட்டுமே என் கவனம் இருக்கும்...!!!

அந்த வகையில் ஷங்கர் ஏமாற்றவில்லை. தியேட்டருக்கு வந்திருந்த 90 சதவிகிதம் ரசிகர்களின் எதிர்பார்ப்பையும் தட்டாமல் நிறைவேற்றியிருக்கின்றார்.

முதலில் பி.சி. ஸ்ரீராம்.... எனக்குத் தெரிந்து அவருக்கு இந்தப்படம், ஒரு புது அனுபவத்தைக் கொடுத்திருக்கும்...!!! கர்நாடிக்கில் வெளுத்து வாங்கும் ஒரு நபர் வெஸ்டர்னிலும் அடித்து தூள் கிளப்புவதைப் போல தன்னை ஒரு ஆல் ரவுண்டராக நிரூபித்திருக்கின்றார்.  சீனா சைக்கிள் சண்டையும், ரயில் சண்டையும் இன்னமும் கண்ணில் அப்பிக்கோண்டேயிருக்கின்றது...!!! சீனத்து இயற்கைக் காட்சிகளும், அந்த அற்புதமான பூக்களூம்.... கிடக்கட்டும்....    சென்னையின் ஹவுசிங் போர்ட் தெருக்களையும், பின்பக்கத்து சாக்கடைகளையும் தியேட்டரில் அப்படியே மணக்க வைத்து விட்டிருக்கிறார்....!!!

ஏ,ஆர், ரஹ்மான இன்றைய இளைஞர்களின் லேட்டஸ்ட் டேஸ்ட்டுக்கு தன்னை முழுமையாக மாற்றிக் கொண்டு விட்டார்....!!! இனி சம கால இளைஞர்களும் அவரை தலையில் தூக்கி வைத்துக் கொண்டாடுவார்கள். பின்னனி இசையை படத்தின் நான்கு தளங்களிலும் அததற்கானதை கொடுத்து பட்டையைக் கிளப்பி விட்டிருக்கின்றார்...!!  பாடல்களின் இசைக் கோர்வைகள் மற்றும் தாளக்கட்டுக்களில் அராஜகம், அதகளம் பண்ணியிருக்கின்றார். சம கால இசையமைப்பாளர்கள் அதில் நிறையை படிக்க வேண்டும்.

ஷங்கர்....  எல்லோரிடமும் வேலை வாங்குவது தான் அவர் வேலை. அதில் அவர் எப்பொழுதுமே தெளிவாக இருக்கின்றார். சுஜாதா, பாலகுமாரன் இல்லாமல் தவிப்பதாக சிலர் எழுதியிருந்தார்கள். எனக்கு அப்படியெல்லாம் எதுவும் புலப்படவில்லை.  ஏனெனில் கதை மற்றும் வசனங்கள் பற்றி அவர் அவ்வளவாக அலட்டிக் கொண்டதாகத் தெரியவில்லை.  காட்சிக்குக் காட்சி படம் பார்ப்பவர்களை குஷிப்படுத்த வேண்டும், பரவசமடைய வைக்க வேண்டும், சொக்க வைக்க வேண்டும், உணர்ச்சிவசப்பட வைக்க வேண்டும், பரிதாபப்பட வைக்க வேண்டும், சிரிக்க வைக்க வேண்டும்.....  என்ற வரிசைப்படி அடுத்தடுத்து காட்சிகளை வைத்து...., சஸ்பென்ஸ், டிவிஸ்ட் என்றெல்லாம் வைப்பது ஓல்ட் ஸ்டைல் என்றெண்ணி, படத்தின் கதையை முதல் பத்து நிமிடங்களுக்குள்ளாகவே மக்களிடம் சொல்லிவிட்டுத் தான் தொடர்ந்து பார்க்க வைக்கின்றார்.

அதனால் தான் படம் முடிந்த பிறகும் ஒரு மூன்று நிமிடங்கள் எண்ட் கார்ட் போடும் போதும் ஒருவர் கூட சீட்டை விட்டு எழுந்திராமல் உட்கார்ந்து விக்ரம் மீண்டும் உருமாறுவதை ஆவலுடனும், ஏக்கத்துடனும் பார்த்துவிட்டு.... கைகளை சந்தோஷத்துடன் தட்டிவிட்டு எழுகின்றனர்....!!  இந்த இடத்தில் தான் டைரக்டர் ஷங்கரின் வெற்றியும், ரசிகர்களின் நாடித்துடிப்பை அவர் பிடித்து வைத்திருப்பதையும் உணர முடிகிறது.!!

எம் என் சி கம்பெனிகளுக்கான விளம்பரங்கள் மட்டுமின்றி பிளாட் புரொமோட்டர்ஸ் விளம்பரம் வரையிலும் அடித்து தூள் கிளப்பியிருக்கும் ஷங்கருக்கு விளம்பரத் துறையிலும் நல்ல எதிர்காலம் இருப்பதை இந்தப்படத்தின் குறியீடாகக் கொள்கிறேன். சில விளம்பரங்கள் நம்மையறியாமல் சபாஷ் போட வைக்கின்றது.... தியேட்டரில் சென்று பார்த்து அனுபவித்தால் தான் புரியும். அவற்றில் பிசி. ஸ்ரீராமும், ரகுமானும், டூ பீஸில் வரும் ஹீரோயினியையும் சேர்த்து வைத்து ஷங்கர் அதகளம் பண்ணியிருக்கின்றார். ராஜீவ் மேனனே கூட ஜெலுஸில் சாப்பிட்டிருப்பார்...!

அடுத்ததாக ஒன் அண்டு ஒன்லி விக்ரம். கமல்ஹாசனுக்குப் பிறகு தமிழ் சினிமாவுக்கு கிடைத்திருக்கும் பொக்கிஷம் அவர். மனுஷன் நீண்ட காலம் வாழ வேண்டும். தயவு செய்து, அதி மேதாவித்தனமாக விமர்சனம் செய்கிறேன் பேர்வழி என்ற பெயரில் அவருடைய உழைப்பை யாரும் குறை சொல்லாதீர்கள். நல்ல கலைஞனை காயப்படுத்தும் சமூகம் உறுப்படாது!! விக்ரம் உழைப்பிற்காகவே இன்னொரு முறை பார்க்கலாம் என்றிருக்கின்றேன். இந்தப்படத்தில் விக்ரம் நடிப்பு பற்றி எழுத ஆரம்பித்தால் இது மாதிரி இன்னும் இரண்டு பதிவுகள் எழுத வேண்டியிருக்கும்.... அது பெரிய எதிர்பார்ப்பைக் கூட்டி, ஏமாற்றத்தைக் கூட தரலாம்.... ஆகவே சாதாரணமாக எந்த முன் முடிவும் இன்றி சென்று இந்தப் படத்தைப் பார்க்கும் அனைவருக்கும்......

நிச்சயம் பைசா வசூல்....!!!

No comments: